ඇමෙරිකානු මහ බැංකුවේ පොලී අනුපාතය ඉහළ යාමේ ඉඩකඩක් පවතින බැවින් සහ චීන ආර්ථිකයේ අස්ථාවරත්වය හේතුවෙන් ඉදිරි කාලය තුළ ශ්‍රී ලංකාවට අවාසිදායක ගෝලීය මූල්‍ය පරිසරයක් ගොඩනැගෙමින් පවතින බව අග්‍රාමාත්‍ය රනිල් වික්‍රමසිංහ මහතා පවසයි. පසුගිය පස්වනදා සිය රජයේ ඉදිරිකාලීන ආර්ථික ප්‍රතිපත්තිය හා මුල්‍ය වැඩපිළිවෙල එළිදක්වමින් පාර්ලිමේන්තුවේදී අගමැතිවරයා මේ බව ප්‍රකාශ කලහ.
ශ්‍රී ලංකාවේ අපනයන ආදායම වසරින් වසර පහත වැටෙන බවත්, 2000 වසරේදී අපනයන දළ දේශීය නිෂ්පාදිතයෙන් 30%ක් වූ අතර එය 2014 වන විට 15% දක්වා 50%කින් පහත වැටී තිබෙන බවද, ශ්‍රී ලංකාවේ ජනගහනයෙන් 43%ක ඉපයීම දිනකට ඇමෙරිකානු ඩොලර් 2කටත් වඩා පහත මට්ටමක පවතින බවද ඒ මගින් රටේ ආදායම් බෙදී යාමේ විෂමතාවය මනාව පෙන්නුම් කරන බවද අගමැතිවරයා පෙන්වා දුන්හ.
පසුගිය රජයේ ඒක පුද්ගල ආදායම් ඉහළ ගොස් ඇති බවට පුරසාරම් දෙඩුවද සැබෑ සංඛ්‍යා ලේඛණ වඩාත් තැතිගන්වන සුළු බවද අගැතිවරයා මෙහිදී ප්‍රකාශ කර සිටියහ.