වර්තමානයේ එක්සත් ජාතික පක්ෂය ජාතිවාදයෙන් තොරව ඉදිරියට යාමේ වැඩ පිළිවෙළක් අරඹා ඇති බව එක්සත් ජාතික පක්ෂ ගම්පහ දිස්ත්‍රික් නායක අර්ජුන රණතුංග මහතා පවසයි.
ගම්පහ එඬේරමුල්ල ප්‍රදේශයේ පැවති වැඩසටහනකට එක්වෙමින් ඔහු මේ බව සඳහන් කළේය.
මෙහිදී වැඩිදුරටත් අදහස් දැක්වු ඒ මහතා පවසා සිටියේ, එක්සත් ජාතික පක්ෂය අද වන විට දෙකඩ වී ඇති බවය.
එය එකතු කිරීමට විශාල උත්සහයක් ගත් බවද පැවසු ඒ මහතා, අවාසනාවකට කණ්ඩායම් දෙකක් ලෙස මෙවර මැතිවරණය සඳහා ඉදිරිපත් වන බවද පැවසීය.
“දුරකථනයේ අය සිරිකොත අල්ලන්න යන බව” පවසන බවද කියා සිටි රණතුංග මහතා, “අපි අල්ලන්න හදන්නේ ආණ්ඩුවක්” යනුවෙන් ද කියා සිටියේය.
පක්ෂය නැති කිරීමට අවස්ථාවක් නොදෙන ලෙස පාක්ෂිකයින්ගෙන් ඉල්ලා සිටින බවද පැවසු ඒ මහතා, ඇතැම් දේශපාලනඥයින්ගේ ප්‍රකාශවලින් පක්ෂයේ අර්බුද රැසක් ඇති වු බව ද සඳහන් කළේය.
තමා “හොඳ බෞද්ධයෙක්” යැයි ද මෙහිදී කියා සිටි රණතුංග මහතා, ශ්‍රී ලංකා පිලේ නායකත්වය දරණ කාලයේ දී සිංහල, දෙමළ හා මුස්ලිම් ක්‍රීඩකයෝ සිටි බවද මෙහිදී අවධාරණය කර සිටියේය.
කිසි දිනක ක්‍රීඩාව තුළ ජාතිවාදය නොතිබු බවද පැවසු අර්ජුන රණතුංග මහතා, අද වන විට පක්ෂය තුළ ද ඒ ක්‍රමවේදය පවත්වා ගැනීමට උත්සහ දරණ බවද පැවසීය.