ලබන වසරේ මාර්තු මාසයේ පැවැත්වෙන පළාත් පලාන මැතිවරණයේදී ශ්‍රී ලංකා නිදහස් පක්ෂය ජයග්‍රහණය කරවීමට ඇප කැප වන බව ජනාධිපති මෛත්‍රීපාල සිරිසේන මහතා අවධාරණය කර සිටියි.
ශ්‍රී ලනිප සභාපති මෛත්‍රීපාල සිරිසේන මහතා එබව සඳහන් කලේ අද (29) පස්වරුවේ මාලබේ නගරයේ දී පක්ෂ කාර්යාලයක් විවෘත කිරීමේ උත්සවයකට සහභාගී වෙමිනි.
මේ අතර, එළැඹෙන පළාත් පාලන මැතිවරණය පවත්වන දිනය සහ පවත්වන ආකාරය සම්බන්ධයෙන් ප්‍රධාන දේශපාලන පක්ෂ අතර බලවත් මතභේද උද්ගතව ඇතැයි දේශපාලන ආරංචි මාර්ග පවසයි.
ජනාධිපතිවරයා විසින් පළාත් පාලන මැතිවරණයේ සීමා නීර්ණය කිරීමේ ගැසට් නිවේදනය පසුගියදා ප්‍රකාශයට පත් කරනු ලැබිය.
පළාත් පාලන ආයතන ඡන්ද විමසීම් ආඥාපනතේ 3 (ඇ) වගන්තියෙන් ජනාධිපතිවරයා වෙත පැවරී ඇති බලතල ප‍්‍රකාරව මෙම පළාත් පාලන ආයතන සීමා නියමයෙන් එහි සඳහන් කර ඇත.
ඒ අනුව මේ මැතිවරණය නව මැතිවරණ ක්‍රමයට අනුව පැවැත්විය යුතු බවට ශ්‍රී ලංකා නිදහස් පක්ෂය දැඩිව ප්‍රකාශ කරන අතර එක්සත් ජාතික පක්ෂයේ බහුතර කැමැත්ත වී ඇත්තේ පළාත් පාලන ඡන්දය සමානුපාතික නියෝජන ක්‍රමයට අනුව පැවැත්වීමටයි.
කෙසේවුවද, මාර්තු මාසයට පෙර අනපේක්ෂිත දිනයක ජනාධිපති මෛත්‍රිපාල සිරිසේන මහතා පළාත් පාලන මැතිවරණය ප්‍රකාශයට පත් කරනු ඇති බව ඉහත දේශපාලන ආරංචිමාර්ග වැඩිදුරටත් පවසයි.