මෙරට ජාතික ආරක්ෂාවට සෘජුව මැදිහත් වෙමින් ඇමරිකානු තානාපතිනි ඇලීනා පෙලිට්ස් සහ ආරක්ෂක උපදේශක ඩග්ලස් හෙස් ඇතුළු ඇමරිකානු නිලධාරීන් පිරිසක් හම්බන්තොට වරායේ ආරක්ෂක කටයුතු නිරීක්ෂණය කර ඇත.
මෙම ඇමරිකානු තානාපති නිලධාරීහු හම්බන්තොට වරායේ ප්‍රධානී අද්මිරාල් ජයන්ත සිල්වා සහ නාවික කඳවුර භාර නිලධාරි අශෝක විජේසිරිවර්ධන හමුවී වරායේ ආරක්ෂාව ගැන කරුණු විමසා තිබේ.
ඉහළ පෙළේ රජයේ ආරංචි මාර්ග පැවසුවේ හම්බන්තොට වරාය වෙත චීන යුද නැව් සහ සබ්මැරින් එන්නේ දැයි දැනගැනීම සඳහා ඇමරිකාව අධි තාක්ෂණික සමුද්‍ර රේඩාර් පද්ධතියක් හම්බන්තොට වරායේ ස්ථාපිත කරදීමට ද ඉදිරිපත් වී ඇති බවයි.
හම්බන්තොට වරාය චීන හමුදා කඳවුරක් වන බවට ඇමරිකානු උප ජනාධිපති මයික් සෙන්ස් පැවසීමෙන් පසු මෙරට ඇමරිකානු තානාපතිනිය සහ ආරක්ෂක උපදේශක ඩග්ලස් හෙස් මෙම නිරීක්ෂණය සිදු කර ඇත.
චීන සමාගමක් විසින් පාලනය කරන හම්බන්තොට වරාය විමර්ශනය කිරීමට ඇමරිකානු තානාපති නිලධාරීන් ක්‍රියා කිරීම වියානා සම්මුතිය උල්ලංඝනය කිරීමක් බව ද ආරංචි මාර්ග කියා සිටියි.
මේ අතර ආරංචි මාර්ග පැවසුවේ හම්බන්තොට වරාය නිරීක්ෂණය කිරීමේ ක්‍රියාවලියට සී. අයි. ඒ. ඔත්තු සේවාවේ නිලධාරියකු ද සහභාගි වී ඇති බවයි.
කීර්ති වර්ණකුලසූරිය