රට තුළ යහපත් පළාත් පාලන ආයතන ව්‍යුහයක් ස්ථාපිත කිරීම වෙනුවෙන් දිවයිනේ සියලු පළාත් පාලන ආයතන නියෝජිතයින් සඳහා අධ්‍යාත්මික සංවර්ධන වැඩමුළු මාලාවක් ඉදිරියේදී පළාත් මට්ටමින් පැවැත්වීමට උපදෙස් ලබාදී තිබෙන බව ජනාධිපති මෛත්‍රීපාල සිරිසේන මහතා පවසයි.
මෙතෙක් පළාත් පාලන ආයතන ක්‍රියාත්මක වූයේ භෞතික සම්පත් සංවර්ධනය සඳහා පමණක් වුව ද මිනිසුන්ගේ ගුණවත්කම් සහ යහපත්කම් සංවර්ධනය කරමින් යහපත් සමාජයක් ගොඩනැගීමට දායකත්වය ලබාදෙන කේන්ද්‍රීය ස්ථානයක් බවට ඉදිරියේදී පළාත් පාලන ආයතන පත්විය යුතු බව ද ජනාධිපතිවරයා පැවැසීය.
දේශපාලන පක්ෂයක තිබිය යුතු විනය සමග දේශපාලනඥයන් තුළ තිබිය යතු විනය, චරිතවත්බව, සවන්දීම සහ නිර්මාණශීලිත්වය ගොඩනගා ගැනීමේ අවශ්‍යතාවය නවක පළාත් පාලන නියෝජිතයින් වෙත පෙන්වා දුන් ජනාධිපතිවරයා විශේෂයෙන් ජනතාව අතරට යමින් ඔවුන්ගේ අවශ්‍යතා සොයා බලා ආයතනික වශයෙන් ඉටුකළ හැකි කාර්යය නොපිරිහෙළා ඉටුකිරීමේ වගකීම ද පැහැදිළි කරනු ලැබුවේය.
ජනාධිපතවරයා මේ බව සඳහන් කළේ පොළොන්නරුව දිස්ති‍්‍රක් නව පළාත් පාලන නියෝජිතයින් සඳහා පැවති වැඩමුළුවකට ඊයේ (01දා) පොළොන්නරුවේදී එක්වෙමිනි.