මනුෂ්‍ය පරිභෝජනයට නුසුදුසු සහල් කිලෝ 75,000 ක තොගයක් පෙරේදා (12 දා) සවස පොළොන්නරුව, ජයන්තිපුර ප්‍රදේශයේ පිහිටි සහල් මෝලක ගබඩාවක තිබී මහජන සෞඛ්‍ය පරික්‍ෂකවරුන් විසින් අත්අඩංගුවට ගෙන ඇත.
මෙම සහල් තොගය වෙළෙඳ සල්වලට බෙදා හැරීම සඳහා සූදානම් කරමින් තිබූ බවද එම නිලධාරීහු පැවසූහ.
මහජන සෞඛ්‍ය පරීක්‍ෂකවරුන්ට ලද තොරතුරක් මත අදාළ සහල් මෝල වටලා සිදුකළ විමර්ශනවලදී එම සහල් ගුල්ලන් සහ පණු කැදලි සහිතව තිබූ බව පොළොන්නරුව දිස්‌ත්‍රික්‌ පරිපාලන මහජන සෞඛ්‍ය පරීක්‍ෂක සුනිල් ජයවර්ධන මහතා ප්‍රකාශ කළේය.
මනුෂ්‍ය පරිභෝජනයට නුසුදුසු, මෙම සහල් තොගය මේ වන විට සීල් තබා ඇති බවත් එහි සහල් සාම්පල රජයේ රස පරික්‍ෂකවරයා වෙත යෑවීමට පියවර ගත් බවත් හෙතෙම කීය.
පොළොන්නරුව දිස්‌ත්‍රික්‌ පරිපාලන මහජන සෞඛ්‍ය පරීක්‍ෂක සුනිල් ජයවර්ධන මහතාගේ මෙහෙයවීම යටතේ ජයන්තිපුර මහජන සෞඛ්‍ය පරීක්‍ෂක ඩී. එම්. එස්‌. එස්‌. අමරසූරිය. තඹාල මහජන සෞඛ්‍ය පරීක්‍ෂක ඊ. ඒ. නුවන් ප්‍රබෝධන, මහජන සෞඛ්‍ය පරීක්‍ෂක එස්‌. ඩී. බාලචන්ද්‍ර, මහජන සෞඛ්‍ය පරීක්‍ෂක නෙවිල් වික්‍රමසිංහ යන මහත්වරුන් විසින් මෙම වැටලීම සිදු කළහ.