ජාතිවාදි හෝ ආගම්වාදි ප්‍රකාශ කරන්නන්ට අවුරුදු දෙකක බරපතළ වැඩ ඇතිව හෝ නැතිව සිරදඬුවම් නියම කිරීම නීතිගත කෙරෙන පනත් කෙටුම්පත් ඊයේ 11 දා පාර්ලිමේන්තුවට ඉදිරිපත් කෙරිණි.
අපරාධ නඩු විධාන සංග්‍රහය සහ දණ්‌ඩ නීති සංග්‍රහය සශෝධනය කරමින් මෙම පනත් කෙටුම්පත් ඉදිරියේදී පාර්ලිමේන්තුවේ විවාද කර සම්මත කර ගැනීමට නියමිතය.
ජන කොටස්‌ අතර වර්ගික හෝ ආගමික කණ්‌ඩායම අතර ආගමික, වර්ගික හෝ ජාතික අසමගිය ඇති කරන ප්‍රකාශ සහිතව ලියන්නට හෝ සංඥ මාර්ගයෙන් ප්‍රකාශ කිරීම මේ අනුව තහනම් වේ.
එමෙන්ම ජනවර්ග ආගමික හෝ වාර්ගික කණ්‌ඩායම් අතර අසන්තෝෂය හෝ සතුරු බව ඇති කිරීම හෝ ඒ සඳහා තැත් කිරීම හෝ ඊට පෙළඹවීම් කිරීම ද තහනම් කර තිබේ.
මෙම චෝදනාවට ලක්‌වූවන් මහෙස්‌ත්‍රාත් අධිකරණය යටතේ නඩු විභාගයකට යටත් කර වරදකරු වූවොත් බරපතළ වැඩ ඇතිව හෝ නැතිව අවුරුදු දෙකක සිරදඬුවමක්‌ නියම වේ.
මෙම චෝදනාව සමථයකට පත් කළ නොහැකි බවද සංශෝධන පනත් කෙටුම්පතෙහි දැක්‌වේ.
ආණ්ඩු පක්‌ෂයේ සංවිධායක ඇමැති ගයන්ත කරුණාතිලක මහතා මෙම සංශෝධන පනත් කෙටුම්පත් දෙක ඊයේ පාර්ලිමේන්තුවට ඉදිරිපත් කළේය.