රාජ්‍ය අමාත්‍ය ලොහාන් රත්වත්තේ මහතාට එරෙහිව මූලික අයිතිවාසිකම් පෙත්සම් ඉදිරිපත් කර ඇති රැඳවියන් 8 දෙනාට ප්‍රමාණවත් ආරක්ෂාවක් සපයන ලෙසට බන්ධනාගාර කොමසාරිස් ජනරාල්වරයාට සහ අනුරාධපුර බන්ධනාගාර අධිකාරිවරයාට උපදෙස් ලබා දෙන්නැයි, ශ්‍රේෂ්ඨාධිකරණය අද (05)දින නීතිපතිවරයාට උපදෙස් දුන්නේ ය.
ඒ, පසුගිය 12 වනදා රාජ්‍ය අමාත්‍ය ලොහාන් රත්වත්තේ මහතා විසින් අනුරාධපුර බන්ධනාගාරය තුළදී පිස්තෝලයක් එල්ල කර, මරණීය තර්ජනය කළේ යැයි, කියන අනුරාධපුරා බන්ධනාගාරයේ රඳවා සිටින පූබාලසිංගම් සුරියපාලම් නමැති රැඳවියා ඇතුළු පෙත්සම්කාර රැඳවියන් 8 දෙනාටයි.
පෙත්සම්කරුවන් ඉල්ලා සිටින්නේ, බන්ධනාගාර ප්‍රතිසංස්කරණ හා පුනුරුත්ථාපන රාජ්‍ය අමාත්‍යවරයා ලෙස කටයුතු කළ රාජ්‍ය අමාත්‍ය ලොහාන් රත්වත්තේ මහතා විසින් පසුගිය 12 වනදා පස්වරුවේ අනුරාධපුර බන්ධනාගාරයට ගොස් එහි සිරිමැදිරිවල රඳවා සිටි තමන් ඇතුළු රැදවියන් පිරිසක් සිර මැදිරිවලින් පිටතට ගෙන විත් දණ ගස්වා මරණීය තර්ජනය කිරීමෙන් සිය මූලික අයිතිවාසිකම් කඩ වූ බවට නිගමනය කරන ලෙසයි.
එම මුලික අයිතිවාසිකම් පෙත්සම් අගවිනිසුරු ජයන්ත ජයසුරිය, මුර්දු ප්‍රනාන්දු සහ එස් තුරෙයිරාජා යන විනිසුරු මඩුල්ල හමුවේ අද කැඳවී ය.
පෙත්සම සම්බන්ධයෙන් ලිඛිත විරෝධතා ලබන 14 වනදා අධිකරණය හමුවේ ගොනු කරන ලෙසට නීතිපතිවරයා ප්‍රමුඛ වගඋත්තකාර පාර්ශවවලට හා පෙත්සම්කාර පාර්ශවයට නියෝග කළ විනිසුරු මඩුල්ල පෙත්සම සලකා බැලීම සඳහා ලබන 21 වනදාට දින නියම කළේ ය.
පෙත්සමේ වග උත්තකරුවන් ලෙස රාජ්‍ය අමාත්‍ය ලොහාන් රත්වත්තේ, අධිකරණ අමාත්‍ය අලි සබ්රි, බන්ධනාගාර කොමසාරිස් ජනරාල් තුෂාර උපුල්දෙණිය සහ අනුරාධපුර බන්ධනාගාර අධිකාරි එච්. ආර් .අජිත් යන මහත්වරුන් නම් කර තිබේ.