එක්ස්ප්‍රස් පර්ල් නෞකාව මුහුදුබත් වීම හේතුවෙන් මෙරට සාගර පාරිසරික කළාපයට සහ සාගර ජීවීන්ට සිදුවූ හානිය, ජීවනෝපාය අහිමි වූ පුද්ගලයින්ට සහ ජාතික ආර්ථිකයට වූ බලපෑම සම්බන්ධයෙන් සොයාබලා නිර්දේශ ඉදිරිපත් කිරීම සඳහා පාර්ලිමේන්තු විශේෂ කාරක සභාවක් පත් කිරීමට යෝජනාවක් ඉදිරිපත්ව තිබේ.
එම යෝජනාව ඉදිරිපත් කර ඇත්තේ හිටපු අග්‍රාමාත්‍ය පාර්ලිමේන්තු මන්ත්‍රී රනිල් වික්‍රමසිංහ මහතා විසිනි.
එම යෝජනාව මේ වනවිට පාර්ලිමේන්තු න්‍යාය පුස්තකය සම්බන්ධ පරිපූරකයට ඇතුලත් කර ඇති අතර එය ඉදිරි දිනකදී පාර්ලිමේන්තුවට ඉදිරිපත් කිරීමට නියමිතයි. ඉකුත් ජුනි මස 22 දෙවන දින කොළඹ වරායට ඔබ්බෙන් වූ මුහුදු තීරයේදී එක්ස්ප්‍රස් පර්ල් නෞකාව මුහුදුබත් වීම මෙරට සාගර කළාපයේ සිදුවූ දරුණුතම පාරිසරික ව්‍යයසනය වේ.
එම සිද්ධිය හේතුවෙන් ඇති වූ ආර්ථික හානිය ගණනය කිරීම, ජීවනෝපාය සම්බන්ධයෙන් බලපෑම් ඇති වූ පුද්ගලයින් සංඛ්‍යාව ඇස්තමේන්තු කිරීම, පීඩාවට පත් ජනතාවට ලබාදිය යුතු මූල්‍යමය සහ අනෙකුත් වන්දි නිර්දේශ කිරීම, හානියට ලක් වූ සාගර කළාපය, ජීවීන් සහ පරිසර ප්‍රමාණය ගණනය කිරීම ආදී කරුණු එමගින් සලකා බැලීමට අපේක්ෂිතය.