පසුගිය ඔක්තෝබර් 29වනදා කොළඹ වෝඩ් පෙදෙසේ විශ්වවිද්‍යාල කොමිසම ඉදිරියේ විරෝධතාවක නිරත වූ සිසුන්ට පහරදීමෙන් පොලීසිය එම සිසුන්ගේ මානව හිමිකම් කඩකළ බවත්, පහරකෑමට ලක්වූ සිසුනට වන්දිය ගෙවිය යුතු බවත්, පහර දුන් පොලිස් නිලධාරීන්ට එරෙහිව නීති මගින් ක්‍රියා කළ යුතු බවත් මානව හිමිකම් කොමිසම ඊයේ 04 නිර්දේශ කළේය.
ඒ අනුව පොලිස් බැටන් ප්‍රහාරයට ලක් වූ සජිනි සන්දීපනී කුමාරසිංහ ශිෂ්‍යාවට රුපියල් 25000 ක වන්දියක්ද,නුවන් ප්‍රදීප් කුමාර,අයේෂ් රත්නසූරිය,සුපුන් නිශාන්,ෂාතිමා හනීනා හුසේන්,සඳුනි චන්ද්‍රසිරි,බුද්ධි උක්වත්ත,නිලූකා නයනා හා ජීවා රූපසිංහට රුපියල් 15000 බැගින් ගෙවිය යුතු බවත් කොමිසම තීන්දු කළේය.
මෙම පහරදීමෙන් පසු පොලීසිය ප්‍රකාශ කළේ දුවද්දී බිම වැටුණු ශිෂ්‍යාවන් නැගිට සිටුවීමට පොලීසිය උදව් කළ බවයි.
සිසුන්ගේ අයිතිවාසිකම් කඩවන අයුරින් කටයුතු කර ඇති නිලධාරීන් කවුරුන්ද යන්න හඳුනාගෙන ඔවුන්ට විරුද්ධව විනයානුකූලව කටයුතු කිරීමට 2016.03.01 ට පෙර මානව හිමිකම් කොමිසමට වාර්තාවක් ඉදිරිපත් කිරීමටත් නිර්දේශ කෙරිණ.