පහ ශ්‍රේණිය ශිෂ්‍යත්ව විභාගය, අපොස සාමන්‍ය පෙළ සහ උසස් පෙළ විභාගවලදී දහම් පාසැල් සහතිකයට ලකුණු ලබාදීමේ වැඩපිළිවෙලක් ආරම්භ කිරීමට රජය සැලසුම් කර තිබෙනවා.
කොළඹ පැවති මාධ්‍ය හමුවකට එක්වෙමින් බුද්ධ ශාසන අමාත්‍ය ගාමිණි ජයවික්‍රම පෙරේරා මහතා කියා සිටියේ ඒ සඳහා අමාත්‍ය මණ්ඩල සන්දේශයක් කඩිනමින් ඉදිරිපත් කිරීමට අපේක්ෂා කරන බවයි.
අධ්‍යාපන අමාත්‍ය අකිල විරාජ් කාරියවසම් මහතා සමගද මේ සම්බන්ධයෙන් සාකච්ඡා කර ඇති බවයි අමාත්‍යවරයා එහිදී ප්‍රකාශ කළේ. ඒ අනුව, අදාළ විභාගවලදී දහම් පාසැල් සහතිකයට ලකුණු 10 ක් පිරිනැමීමට සැලසුම් කර ඇති බව සඳහන්. ඉරිදා දිනවල පෙරවරු කාලයේ සහ පොහොය යෙදන දිනවලදී උපකාරක පන්ති පැවැත්වීම තහනම් කිරීමට අවශ්‍ය අමාත්‍ය මණ්ඩල සන්දේශයක් භාරදීමටද කටයුතු කරන බවයි ගාමිණි ජයවික්‍රම පෙරේරා මහතා වැඩිදුරටත් සඳහන් කළේ.