වෙළෙඳ අමාත්‍යංශයෙන් මාරුකර යවන ලද අතිරේක ලේකම්වරයකු ඔහු කලින් භාවිත කළ ටොයෝටා ප්‍රාඩෝ වර්ගයේ ජීප් රථයද මාරුවී යන විට රැගෙන ගොස් ඇතැයි වෙළෙඳ අමාත්‍යාංශයේ ලේකම්වරයා කොම්පඤ්ඤවීදිය පොලිසියට පැමිණිලි කර ඇත.
මෙම අතිරේක ලේකම්වරයා රාජ්‍ය පරිපාලන අමාත්‍යාංශයට මාරුකර යවා ඇති අතර ඔහු අතිරේක ලේකම්වරයා ලෙස භාවිත කළ වාහනයද ඒ සමගම රැගෙන ගොස් ඇති බව ලේකම්වරයා පොලිසියට කළ පැමිණිල්ලේ සඳහන් වේ.
වෙළෙඳ අමාත්‍යාංශය සතු ප්‍රාඩෝ වර්ගයේ ජීප් රථය ඉකුත් 16 වැනිදා සිට අස්ථාන ගතවී ඇති අතර ඒ පිළිබඳව සොයා බැලීමේදී එය හිටපු අතිරේක ලේකම්වරයා රැගෙන ගොස් ඇති බව දැන ගන්නට ලැබී ඇතැයිද ලේකම්වරයා පොලිසියට දන්වා ඇත.
අත්‍යවශ්‍ය සේවා සපයන වෙළෙඳ අමාත්‍යාංශයට එම වාහනය වහාම ලබා දෙන්නැයි වෙළෙඳ අමාත්‍යාංශයේ ලේකම්වරයා පොලිසියෙන් ඉල්ලීමක් කර තිබේ.