ආනයනය කරන ලද වාහන අමතර කොටස්‌ සඳහා ගෙවිය යුතු තීරුබදු නොගෙවා සිටීම සඳහා වාහන අමතර කොටස්‌ අලෙවිකරුවකුගෙන් රුපියල් කෝටි 12 1/2 ක මුදලක්‌ අල්ලස් ලෙස ඉල්ලා ලබා ගත්තේ යෑයි අත්අඩංගුවට ගෙන රක්‍ෂිත බන්ධනාගාරගත කර සිsටි රේගු නිලධාරීන් තිදෙනා රුපියල් එක්‌කෝටි එක්‌ලක්‍ෂය බැගින් වූ ඇපයකට යටත් කොට දැඩි කොන්දේසි සහිතව මුදාහරින ලෙස කොළඹ ප්‍රධාන මහෙස්‌ත්‍රාත් ගිහාන් පිලපිටිය මහතා ඊයේ (01 දා) නියෝග කළේය.
අල්ලස් හෝ දූෂණ චෝදනා විමර්ශන කොමිෂන් සභාව මගින් සිදුකළ වැටලීමකින් අත්අඩංගුවට ගෙන රක්‍ෂිත බන්ධනාගාරගත කර මෙසේ ඇප මත මුදාහරිනු ලැබූයේ රේගු අධිකාරී සුධීර පරාක්‍රම ජිනදාස, නියෝජ්‍ය රේගු අධිකාරි ජගත් ගුණතිලක සහ සහකාර රේගු අධිකාරි උපාලි ගුණරත්න යන තිදෙනායි.
සැකකරුවන් තිදෙනා ඇප මත මුදාහරිමින් ඔවුන් හට ඇප කොන්දේසි පනවනු ලැබූ මහෙස්‌ත්‍රාත්වරයා සෑම මසකම අවසන් ඉරු දින උදේ 9 ත් මධ්‍යහ්න 12 ත් අතර කාලයේ අල්ලස් කොමිෂන් සභාව හමුවේ පෙනී සිට වාර්තා කරන ලෙසත් ඔවුන්ගේ විදේශ ගමන් තහනම් කරන බවත් දන්වා සිටියේය.
සිද්ධියට අදාළ පැමිණිල්ල ලබන පෙබරවාරි 16 දා යළි කැඳවීමට නියමිතය.