ලක්ෂ තිහක පිරිසක් සදහා සින්නක්කර ඉඩම් හා නිවාස ලබා දීමට රජය කටයුතු කරන බව අගමැති රනිල් වික්‍රමසිංහ මහතා ප්‍රකාශ කරනවා. එක්සත් ජාතික පෙරමුණු රජයේ මධ්‍ය කාලීන් ආර්ථික ප්‍රතිපත්තිය ඉදිරිපත් කරමින් අද (5) පාර්ලිමේන්තුවේ දී අගමැතිවරයා මේ බව පැවසීය.
වසර දහයකට වඩා බලපත් ලාභි ඉඩම්වල රැදී සිටින අයටත්, වසර දහයකට වැඩි කාලයක් කුලී නිවාස වල සිටිනා අයටද එම දේපළවල හිමිකාරීත්වය ලබා දෙන බවද මෙහිදී ප්‍රකාශ විය. රැකියා දශලක්ෂයක් බිහි කිරීමේ රජයේ වැඩපිළිවෙලට දේශීය හා විදේශීය ආයෝජකයන් එක්කර ගැනීමේ අංග සම්පූර්ණ වැඩ පිළිවෙලක් ඇති බවත් වසර පහකදී රැකියා දශ ලක්ෂයක් බිහි කිරීමේ අරමුණින් ආයෝජන සදහා වන සියලු බාධක ඉවත් කරන බවද අගමැතිවරයා පැවසීය.
ඊ.ටී.එෆ් සහ ඊ.පී.එෆ් අරමුදල් එකතුකරන නව අරමුදලක් පිහිටුවන බවද විශ්වවිද්‍යාල සිසුන්ට ලැප්ටොප් පරිගණක මිළදී ගැනීම සදහා අඩු පොලී යටතේ ණය පහසුකම් ලබා දෙන බවද, සෑම විශ්වවිද්‍යාලයකටම වයි-ෆයි පහසුකම ලබා දීමට කටයුතු කරන බවද අගමැතිවරයා සිය ප්‍රකාශයේ දී සදහන් කළහ.