රාජකාරි වේලාවේදී නිරෝධායන නීති රීති උල්ලංඝනය කරමින් රාජ්‍ය දේපල අවභාවිතා කරමින් මත්පැන් සාදයක් පැවැත්වීමේ සිද්ධියක් සම්බන්ධයෙන් චෝදනාවට ලක්ව සිටින වයඹ පළාත් පරිවාස කොමසාරිස්වරයා ඇතුළු පිරිසකට විමර්ශන කටයුතු අවසන් වන තෙක් ස්ථාන මාරු ලබා දී ඇතැයි වයඹ පළාත් ආණ්ඩුකාර කාර්යලය කියි.
ඒ අනුව වයඹ පළාත් පරිවාස කොමසාරිස්වරයා එම තනතුරෙන් ඉවත් කර කාර්ය නියමයක් නොමැතිව වයඹ පළාත් සෞඛ්‍ය අමාත්‍යාංශයට අනුයුක්ත කර තිබෙන අතර මූලස්ථාන ජ්‍යෙෂ්ඨ පරිවාස පරීක්ෂකවරයා පරිවාස දෙපාර්තමේන්තුවෙන් ඉවත් කර එම විෂය බාර පළාත් අමාත්‍යාංශයට අනුයුක්ත කර ඇත.
මෙම පිරිස මත්පැන් සාදය සඳහා රැගෙන ගිය බව කියන පරිවාස දෙපාර්තමේන්තුවට අයත් වෑන් රථය පැදවූ රියැදුරා ආණමඩුව ප්‍රාදේශීය ලේකම් කාර්යාලයට මාරු කර යවා ඇත.
වයඹ පළාත් ආණ්ඩුකාර රාජා කොල්ලුරේ මහතාගේ නියමයෙන් වයඹ පළාත් රාජ්‍ය සේවා කොමිසම සහ වයඹ පළාත් ප්‍රධාන ලේකම්වරයා විසින් මෙම ස්ථාන මාරුවීම් ක්‍රියාත්මක කර තිබේ.