හම්බන්තොට මාගම්පුර ජාත්‍යන්තර වරායේ සේවයේ නියුතුව සිටි සේවකයන් තමන් වරාය අධිකාරියේ සේවයට බදවාගන්නා ලෙස ඉල්ලමින් දින හැටක් පුරා අඛණ්ඩව කරගෙන ගිය විරෝධය හා දින එකොළහක් පුරා කරගෙන ගිය මාරාන්තික උපවාසය අද අත්හරිනු ලැබීය.
පසුගිය වසරේ දෙසැම්බර් මස 30 වැනිදා සිට තම රැකියා අහිමිවීමත් සමග මෙම සේවකයන් පිරිස විරෝධතාව ආරම්භ කළේය.
පසුගිය 17 වනදා එම ස්ථානයට පැමිණි පූජ්‍ය ඕමල්පේ සෝභිත හිමියන්ගේ මැදිහත්වීමෙන් වරාය හා නාවික කටයුතු අමාත්‍යවරයා සමග පැවති සාකච්ඡාවකින් අනතුරව සේවකයන් 438 දෙනා අතරින් 138 දෙනෙකු වරාය අධිකාරියට බදවාගැනීමටත්, ඉතිරි සේවකයක් හට ලක්ෂ 10කට වැඩි වන්දි මුදලක් ලබාදීමේ පොරොන්දුව මත තම උපවාසය අත්හැරි බව වරාය සේවකයෝ පවසති.
