අද වනවිට ලංකාවේ ලොකුම හොරකම සිදුවන්නේ විදුලියෙන් බවත් විදුලිය නිපදවීම සඳහා මෙරටට ගෙන්වන එක් ගල්අඟුරු නැවකින් රුපියල් කෝටි 12ක්ද, පාරිභෝගිකයාට ලබාදෙන එක් විදුලි ඒකකයකින් රුපියල් 14ක්ද හොරකම් කරන බවත් කැෆේ සංවිධානයේ විධායක අධ්‍යක්‍ෂ කීර්ති තෙන්නකෝන් මහතා පැවැසීය.
පසුගියදා මාධ්‍ය හමුවට එක්වෙමින් ඔහු ඒ බව සඳහන් කළේය.
විදුලිබල මාෆියාවක් ක්‍රියාත්මක වන බව එහිදී පෙන්වා දුන් ඔහු තවදුරටත් පැවැසුවේ විදුලිබල මණ්ඩලයේ ක්‍රියාවලීන්වලට ආයෝජකයන් ලංකාවට පැමිණියද ඔවුන්ට ආයෝජන සිදු කිරීමට ඉහළ රාජ්‍ය නිලධාරීන් ඉඩ ලබානොදෙන බවයි.
මෙරට ඉහළ රාජ්‍ය නිලධාරීන් විසින් සිදුකරන වංචා, දූෂණ පිළිබඳව සිවිල් සංවිධාන ලෙස මේ කරුණු දිගින් දිගටම රටට අනාවරණය කළද වගකිවයුත්තන් ඒවාට නිසි පියවර නොගන්නා බවටද ඔහු චෝදනා කළේය.