ඉස්ලාමීය නීති යටතේ හරාම් කාණ්ඩයට අයත් ඌරු මස් ජෙලටින් එන්නතක් ලබා දිය නොහැකි බව පවසමින් එම එන්නත ප්‍රතික්ෂේප කිරීමට මුම්බායි හි මුස්ලිම් විද්වතුන් ක්‍රියා කර තිබෙනවා.
කොරෝනා වයිරස් එන්නතක් පැමිණෙන තෙක් සියලු දෙනා බලා සිටින මොහොතක, මුම්බායි හි දී ඉස්ලාම් විද්වතුන් යැයි කියා ගන්නා උලමා සභාව රැස්වී ඌරු මස් ජෙලටින් අඩංගු එන්නත කිසිදු මුස්ලිම්වරයෙකුට ලබා දිය නොහැකි බවට තීරණය කර ඇති බව India Today වෙබ් අඩවිය වාර්තා කර තිබෙනවා.
බදාදා මුම්බායි හි පැවති සුන්නි මුස්ලිම් උලමා රැස්වීමකදී, ඌරු ජෙලටින් අඩංගු යැයි කියනු ලබන චීන එන්නතක් මුස්ලිම්වරුන්ට තහනම් බවට තීරණය කර ඇත. කොවිඩ් -19 ට එරෙහි චීන එන්නතක ඌරු ව්‍යුත්පන්න ජෙලටින් අඩංගු බවට වාර්තා වී ඇති අතර මෙය ලොව පුරා මුස්ලිම්වරුන් අතර කනස්සල්ලට හේතු වී තිබේ.
ඉස්ලාමීය නීති සම්බන්ධයෙන් කරුණු තීරණය කිරීම සඳහා “උලමා සභාව”ලෙස හැඳින්වෙන මුස්ලිම් විද්වතුන් විසින් මෙම රැස්වීම කැඳවන ලදී. රැස්වීමෙන් පසුව ඔවුන් තීරණය කළේ ඉස්ලාමීය නීතිවලට අනුව ඌරු මස් ආහාරයට ගැනීම තහනම් බවත් ඒවා අඩංගු කිසිවක් අවසර නැති බවත්ය.
මෙම තීරණය කියවන අතරතුර, රාසා ඇකඩමියේ මහලේකම් සයීඩ් නූරි පැවසුවේ, “චීන එන්නත නිපදවීම සඳහා ඌරා ගේ ශරීරයේ කොටස් බාවිතා කර ඇති බවට වාර්තා තිබේ. එය මුස්ලිම්වරුන්ට හරාම් බැවින් ඌරා ගේ ශරීර කොටස් අඩංගු එන්නතකට ඉඩ දිය නොහැක. ”
කාසි-ඊ-මුම්බායි හස්රත් මුෆ්ති මෙහමූඩ් අක්තාර්ගේ තීරණය කියවන අතරතුර නූරි පැවසුවේ “ළිඳකට ඌරාගේ රෝම කූපයක් වැටුණත් එම ළිඳෙන් ජලය මුස්ලිම්වරුන්ට තහනම්ය. එබැවින් ඉස්ලාමීය නීතියට අනුව ඌරන්ගේ ජෙලටින් අඩංගු එන්නතකට කිසිදු රෝගයකට ප්‍රතිකාරයක් ලෙස ක්‍රියා කළ නොහැක. ” යනුවෙනි.