විදේශ සබඳතා අමාත්‍ය දිනේෂ් ගුණවර්ධන මහතා සහ අමෙරිකානු රාජ්‍ය ලේකම් මයික් පොම්පියෝ මහතා ඊයේ (29)දින දුරකථන සංවාදයක නිරත වූ බව විදේශ සබඳතා අමාත්‍යාංශය නිවේදනයක් නිකුත් කරමින් පවසයි.
එම සංවාදයේදී පසුගිය දා ප්‍රකාශයට පත් කළ MCC සමාලෝචන වාර්තාව ගැන අමාත්‍ය දිනේෂ් ගුණවර්ධන මහතා විසින් රාජ්‍ය ලේකම්වරයාව දැනුවත් කර තිබේ.
එසේම එළඹෙන පාර්ලිමේන්තු මැතිවරණය පිළිබඳව ද ඔවුන් දෙදෙනා අදහස් හුවමාරු කරගෙන ඇත.
ශ්‍රී ලංකාවේ සංවර්ධනය සහ ස්වෛරීභාවය උදෙසා තවදුරටත් කැපවන බව අමෙරිකානු රාජ්‍ය ලේකම් මයික් පොම්පියෝ මහතා එහිදී පවසා තිබේ.
මෙරට ජනතාව සමග පවතින අමෙරිකානු සබඳතා තවදුරටත් පුළුල් කිරීමට කටයුතු කරන බව ද අමෙරිකානු රාජ්‍ය ලේකම්වරයා ප්‍රකාශ කර තිබේ.
කොවිඩ් නයින්ටීන් වසංගතයට එරෙහිව සටන් කිරීම දෙරටේම පොදු අවශ්‍යතාවක් බව සඳහන් කර ඇති මයික් පොම්පියෝ මහතා මෙරට ආර්ථික ස්ථාවරභාවය සහ තිරසර සංවර්ධනය සඳහා කැපවන බව ද යළිත් ප්‍රකාශ කළ බව අමෙරිකානු රාජ්‍ය දෙපාර්තමේන්තුව සඳහන් කළේය.
එමෙන්ම කොවිඩ් නයින්ටීන් වසංගත තත්ත්වය පාලනය කිරීම සඳහා ගත යුතු ක්‍රියාමාර්ග සම්බන්ධයෙන් ද දෙපාර්ශවය මෙහිදී සාකච්ඡා කර තිබේ.
මේ වන විටත් අමෙරිකානු ඩොලර් මිලියන 6 කට ආසන්න ප්‍රමාණයක් ශ්‍රී ලංකාවේ කොවිඩ් නයින්ටීන් මර්දන කටයුතු සඳහා අමෙරිකාව විසින් ලබා දී ඇති බව සඳහන්ය.
මීට අමතරව අමෙරිකානු රාජ්‍ය ලේකම් මයික් පොම්පියෝ මහතා ප්‍රජාතන්ත්‍රවාදී සම්ප්‍රදායන්, මානව හිමිකම් මෙන්ම ජනතාවගේ දිගුකාලීන ස්ථාවරභාවය සහ විනිවිදභාවයේ වැදගත්කම පිළිබඳව ද සාකච්ඡා කළ බව අමෙරිකානු රාජ්‍ය දෙපාර්තමේන්තුව වැඩිදුරටත් සඳහන් කරයි.