අපිරිසුදු කොත්තමල්ලි, ගෙන්දම් දමා පිරිසුදු කර වෙළෙඳපොළට නිකුත් කිරීමේ ජාවාරමක් පිළිබඳව කල්මුණේ ප්‍රදේශයෙන් වාර්තා වී ඇතැයි සෞඛ්‍ය අමාත්‍යාංශයේ ආරංචි මාර්ග සඳහන් කරයි.
කොවිඩ් වයිරසය පැතිර යාමත් සමග ජනතාව කොත්තමල්ලි පානය කිරීමට පෙලඹී ඇති බැවින්, එහි ඉල්ලුමද මේ වනවිට ශීඝ්‍රයෙන් ඉහළ ගොස් තිබේ. මේ අතර විවිධ ජාවාරම්කරුවන් ප්‍රමිතියෙන් බාල කොත්තමල්ලි විවිධ ක්‍රම යොදාගනිමින් වෙළෙඳපොළට නිකුත් කරන බවට සෞඛ්‍ය අමාත්‍යාංශයේ ආහාර පාලන ඒකකයට තොරතුරු ලැබී තිබේ.
ගෙන්දගම් දමා පිරිසුදු කරන කොත්තමල්ලි දීප්තිමත් බවකින් යුක්ත බැවින් ඉතා පිරිසුදු කොත්තමල්ලි යැයි සිතා ජනතාව විශාල වශයෙන් ඒවා මිලදී ගැනීමට පෙලඹී ඇති බව එම ප්‍රකාශකයා පවසයි.
ගෙන්දගම් දමා පිරිසුදු කරන කොත්තමල්ලි දිවයිනේ සෑම ප්‍රදේශයකටම බෙදා හරින බවට ආහාර පාලන ඒකකයට තොරතුරු ලැබී ඇති බැවින් ඒ පිළිබඳව සොයා බැලීමට ගිය විට එම කර්මාන්තශාලාව වසා දමා ඇති බවක් පෙන්නුම් කර ඇතැයිද එහෙත් කර්මාන්තශාලාව වසා දමා නොමැති බවත්, පාරිභෝගික ඉල්ලුම පරිදි දිගින් දිගටම වෙළෙඳපොළට කොත්තමල්ලි සපයන බවත් ප්‍රදේශවාසීහු කියති.