පළාත් පාලන ආයතන විසින් තෝරා ගනු ලැබූ ස්ථානවලට කැළි කසළ බැහැර කිරීමේදී එම කටයුතුවලට බාධා කරන පිරිස් අත්අඩංගුවට ගැනීම සඳහා විශේෂ වැඩපිළිවෙළක් පොලිස් මූලස්ථානය විසින් ආරම්භ කර තිබේ.
ජනාධිපති මෛත්‍රිපාල සිරිසේන මහතාගේ නියෝග පරිදි මේ සම්බන්ධයෙන් අතිවිශේෂ ගැසට් පත්‍රයක්ද ඉකුත් 20 වැනිදා මධ්‍යම රාත්‍රියේ සිට බලපැවැත්වෙන අයුරින් නිකුත් කෙරිණි.
විශේෂයෙන් මීතොටමුල්ල කුණු කන්ද නාය යෑමත් සමඟ කොළඹ මහ නගර සභා සීමාවේ එක්රැස්වන කුණු කසළ බැහැර කිරීමට තෝරාගෙන ඇති පිළියන්දල කරදියාන, මාලිගාවත්ත ආදී කසළ මධ්‍යස්ථානවලට නගර සභා සේවකයන් කසළ රැගෙන යෑමේදී ඊට බාධා පමුණුවන සහ ගැටුම්කාරී තත්ත්වයන් ඇති කරන පිරිස් පාලනයට පොලිසියට අමතරව විශේෂ කාර්ය බළකා නිලධාරීන්ද එම ප්‍රදේශයන්ට කැඳවා තිබේ.