අභ්‍යන්තර වෙළෙඳ කටයුතු සහ සමුපකාර ඇමතිවරයා ලෙස කටයුතු කළ සමයේ සතොස සේවකයන් ඔවුන්ගේ නිල රාජකාරි කටයුතුවලින් බැහැරව දේශපාලන හා පෞද්ගලික කටයුතුවලට යෙදවීමේ චෝදනාව යටතේ හිටපු ඇමති ජොන්ස්ටන් ප්‍රනාන්දුට එරෙහිව පැවරූ නඩුව ලබන අගෝස්තු 04 වනදා විභාග කිරීමට කොළඹ මහාධිකරණය දින නියම කරන ලදී.
අද දින මහාධිකරණ විනිසුරු මංජුල තිලකරත්න ඉදිරියේ මෙම නඩුව විභාගයට ගත් අවස්ථාවේ පැමිණිල්ල වෙනුවෙන් සතොස මූල්‍ය ප්‍රධානී සාක්ෂි ලබා දුන් අතර, සතොස හිටපු අධ්‍යක්ෂවරයා විසින් ප්‍රශ්නගත සේවකයන්ට වැටුප් ගෙවන ලෙස තමාට බලපෑම් කළ බව සාක්ෂිකාරිය කියාසිටියාය.
ජොන්ස්ටන් ප්‍රනාන්දු වෙළෙඳ අමාත්‍යවරයා වශයෙන් කටයුතු කළ 2010 – 2015 දක්වා කාලය තුළදී සතොස ආයතනයේ සේවකයන් ඔවුන්ගේ නිල රාජකාරිවලින් ඉවත් කොට එම ආයතන මගින් වැටුප් ගෙවමින් දේශපාලන කටයුතුවල යෙදවීම හරහා, රජයට පාඩු කළ බවට චෝදනා කොට අල්ලස් පනතේ 70 වැනි වගන්තිය යටතේ දූෂණය යන වරදට නඩු පවරා තිබේ.
නඩුවේ සෙසු විත්තිකරුවන් වන්නේ සතොස හිටපු සභාපතිවරයෙක් වන එරාජ් ප්‍රනාන්දු සහ එහි හිටපු අධ්‍යක්ෂවරයකු වන මොහොමඩ් සාකීර්ය.