දේශපාලකයන් තමන්ගේ පටු දේශපාලන අරමුණු වෙනුවෙන් බුද්ධ චීවරය භාවිතා කිරීම ඉතා අශෝභන ක්‍රියාවක් බවත්, සිල් රෙදි නඩුවට අදාල දඩ මුදල් එකතු කරවීම සදහා ඒකාබද්ධ විපක්ෂය විසින් භික්ෂූන් වහන්සේලා යොදාගැනීම තරයේ හෙළා දකින බවත් දූෂණ විරෝධි පෙරමුණේ පුජ්‍ය උලපනේ සුමංගල හිමියන් පවසයි.
ඒකාබද්ධ විපක්ෂයේ නායකයන් තමන්ගේ වැරදි නියෝග නිසා දඩුවම් ලැබූ නිලධාරීන් දෙපළ වෙනුවෙන් ඉදිරිපත් නොවී, ඒ වෙනුවට භික්ෂූන් වහන්සේලා ඉදිරියට දමමින් ශාසන සම්ප්‍රදාය සමාජය ඉදිරියේ හෑල්ලුවට ලක් කරවීම බරපතල කාරණාවක් බවද එහිමියන් කියා සිටියේය.
එමෙන්ම රජයේ ඇමතිවරුන් වන සරත් ෆොන්සේකා සහ රංජන් රාමනායක භික්ෂූන් වහන්සේලාට ආමන්ත්‍රණය කළ ආකාරය ඉතා අශෝභන බවත් ජනතාව නිසි අවස්ථාවේදී ඔවුන්ට පිළිතුරු දෙනු ඇති බවත් ඊයේ පස්වරුවේ කොළඹදී පැවති මාධ්‍ය හමුවකදී සුමංගල හිමියන් වැඩිදුරටත් කියා සිටියේය.