ටොම් මූඩි ශ්‍රී ලංකා ක්‍රිකට් අධ්‍යක්ෂක ධුරයට පත්කිරීමට සුදානමක් තිබෙන බව espncricinfo වෙබ් අඩවිය වාර්තා කර ඇත. මෙම තනතුර අලුත් තනතුරක් වන අතර එවැනි තනතුරක් දැනට ශ්‍රී ලංකා ක්‍රිකට් පරිපාලනයේ නොමැත. ඕස්ට්‍රේලියාවේ, එංගලන්තයේ සහ ඉන්දියාවේ ක්‍රිකට් ව්‍යුහයන් තුළ වැඩ කරන ලද මූඩිගේ අත්දැකීම් උපයෝගී කර ගනිමින් ශ්‍රී ලංකා ක්‍රිකට් ක්‍රීඩාව දියුණු කිරීම අපේක්ෂා කෙරෙන බව අරවින්ද ද සිල්වා පවසා ඇත.
ශ්‍රී ලංකාවේ ක්‍රිකට් සංවර්ධනය අධීක්ෂණය කිරීම සඳහා ක්‍රීඩා අමාත්‍යාංශය විසින් පත් කරන ලද තාක්ෂණික උපදේශක කමිටුව අරවින්ද ද සිල්වා විසින් මෙහෙයවනු ලැබේ. එම කමිටුවේ හිටපු ක්‍රිකට් ක්‍රීඩකයින් වන රොෂාන් මහනාමා, මුත්තයියා මුරලිදරන් සහ කුමාර් සංගක්කාර ද සිටිති.
ශ්‍රී ලංකා ක්‍රිකට් ආයතනය විසින් ඉදිරි සතිය තුළදී මෙම පත්වීම පිළිබඳ අවසන් තීරණයක් ගැනීමට බලාපොරොත්තු වේ.