කිලිනොච්චියේ යුද හමුදා කඳවුරකට බලහත්කාරයෙන් ඇතුළු වූ විපක්ෂ නායක ආර්. සම්බන්ධන් අත්අඩංගුවට ගන්නැයි ඒකාබද්ධ විපක්ෂය පොලීසියට බල කර සිටියි.
ජාතික නිදහස් පෙරමුණේ නායක විමල් වීරවංශ සහ පිවිතුරු හෙළ උරුමයේ ලේකම් උදය ගම්මන්පිළ මෙම අදහස් පළ කළේ කොළඹ අද (24) පැවැති මාධ්‍ය හමුවකදීයි.
විපක්ෂ නායක ආර්. සම්බන්ධන්, දෙමළ ජාතික සන්ධානයේ මන්ත්‍රීවරුන් පිරිසක් සහ රාජ්‍ය නොවන සංවිධානයක නිලධාරීන් කණ්ඩායමක් සමඟ මෙම යුද හමුදා කඳවුරට ඇතුළු වී ඇති බවට ඔවුන් චෝදනා කරයි.
පොලිස්පතිවරයා තම අපක්ෂපාතීත්වය පෙන්වීමට නම් වහාම විපක්ෂ නායකවරයා අත්අඩංගුවට ගන්නා ලෙස අභියෝග කරන බව පිවිතුරු හෙළ උරුමයේ ලේකම් උදය ගම්මන්පිළ මහතා පැවසී ය.