අත්අඩංගුවේ පසුවන බස්නාහිර පළාත් හිටපු ආණ්ඩුකාර අසාද් සාලි මහතා විසින් ඉකුත් මාර්තු මස කොළඹ පැවති මාධ්‍ය හමුවකදී සිදු කළ ආන්දෝලනාත්මක ප්‍රකාශයට අදාළ විමර්ශන කටයුතු අවසන් කර ඇතැයි නීතිපතිවරයා අද (14)දින ශ්‍රේෂ්ඨාධිකරණයට දැනුම් දී තිබේ.
නීතිපතිවරයා වෙනුවෙන් පෙනීසිටි රජයේ නියෝජ්‍ය සොලිසිටර් ජනරාල් දිලීප පිරිස් මහතා මෙම දැනුම් දීම සිදු කළේය.
ඒ, තමන්ව ත්‍රස්තවාදය වැළැක්වීමේ පනත යටතේ අත්අඩංගුවට ගෙන රඳවා ගැනීම නීතිවිරෝධී බව ප්‍රකාශ කරන මෙන් ඉල්ලා අසාද් සාලි මහතා විසින් ගොනුකර තිබූ මූලික අයිතිවාසිකම් පෙත්සමක් අද කැඳවූ අවස්ථාවේදීය.
අපරාධ පරීක්ෂණ දෙපාර්තමේන්තුව විසින් ඊට අදාළ උද්ධෘත නීතිපතිවරයා වෙත යොමුකර ඇති බවත් ඉදිරි සතිය තුළ මෙම උදෘත පරීක්ෂාකර චෝදනා ගොනු කිරීමට හැකියාවක් තිබේ ද? යන්න තීරණය කරන බවත් නියෝජ්‍ය සොලිසිටර් ජෙනරාල්වරයා දැනුම් දී ඇත.
මෙහිදී විනිසුරු දෙහිදෙණිය මහතා මතු කළ ප්‍රශ්නයකට පිළිතුරු දුන් නියෝජ්‍ය සොලිසිටර් ජෙනරාල් දිලීප පිරිස් මහතා සඳහන් කළේ, මාවනැල්ල බුදු පිළිමවලට එල්ල කළ ප්‍රහාර සිද්ධියට අදාළව මෙම සැකකරු සම්බන්ධයෙන් සිදුකරන විමර්ශන තවදුරටත් පැවැත්වෙන බවද පවසා තිබේ.
අනතුරුව පෙත්සම සලකා බැලීම ලබන 28 වනදා තෙක් කල් තැබුණි.