ජනාධිපති මන්දිරයට බලහත්කාරයෙන් ඇතුළු වී එහි දේපළවලට අලාභ හානි සිදු කිරීම සම්බන්ධයෙන් සැකකරුවන් හඳුනා ගැනීම සඳහා පොලිසිය මහජන සහය පතයි.
ජූලි 9 වන දින ජනාධිපති මන්දිරයට විරෝධතාකරුවන් පිරිසක් බලහත්කාරයෙන් ඇතුළු වී එහි තිබූ දේපළවලට අලාභ හානි සිදු කිරීම සම්බන්ධයෙන් සැකකරුවන් අත්අඩංගුවට ගැනීම සඳහා කොළඹ මධ්‍යම කොට්ඨාශය අපරාධ විමර්ශන අංශය මගින් විමර්ශනයක් සිදු කරයි.
ඒ අනුව, එම සිද්ධියට සම්බන්ධ බවට සමාජ මාධ්‍ය ජාලා සහ සී.සී.ටී.වී. දර්ශන මගින් හඳුනාගත් මෙතෙක් අනන්‍යතාවය අනාවරණය කර ගැනීමට නොහැකි වූ සැකකරුවන් 32 දෙනෙකු හඳුනා ගැනීම සඳහා පොලිසිය මහජන සහය පතා තිබේ.
අදාළ පුද්ගලයින් සම්බන්ධයෙන් යම් තොරතුරක් වෙතොත් පහත සඳහන් දුරකතන අංක වෙත දැනුම් දෙන ලෙස පොලිසිය මහ ජනතාවගෙන් ඉල්ලා සිටියි.
071-8591559 / 071-8085585 / 011-2391358 / 1997
