හැටන් නගරයේ ලංගම බස් නැවතුම්පළ අසල කුරියර් සේවා ආයතනයක් මගින් කොළඹට ප්‍රවාහනය කිරීම සඳහා භාරගෙන තිබුණේ යැයි කියන ගෘහස්ථ ලාෆ් ගෑස් සිලින්ඩර් 20 ක් නුවරඑලිය පාරිභෝගික සේවා අධිකාරියේ නිලධාරීන් සහ හැටන් පොලිසියේ නිලධාරින් එක්ව 23 දින පොලිස් භාරයට ගෙන තිබේ.
කිලෝ 12.5 ගෘහස්ථ ගෑස් සිලින්ඩර් 12 ක් සහ කිලෝ 7.5 ගෑස් සිලින්ඩර් 08 ක් පොලිස් භාරයට ගෙන ඇත.
පාරිභෝගිකයන් විසින් හැටන් පොලිසියට කළ දැනුම් දීමක් මත හැටන් පොලිසියේ නිලධාරින් නුවරඑලිය පාරිභෝගික සේවා අධිකාරියේ නිලධාරින් සමග එක්ව එම කුරියර් ආයතනයට ගොස් ගෑස් සිලින්ඩර් තොගය තම භාරයට ගත් බව හැටන් මුලස්ථාන පොලිසියේ ස්ථානාධිපති ප්‍රධාන පොලිස් පරීක්ෂක රංජිත් ජයසේන මහතා පවසයි.
කුරියර් සේවා ආයතනයට ගෑස් සිලින්ඩර් ළඟ තබා ගැනීම හෝ ප්‍රවාහනය කිරීම සපුරා තහනම් බවත්, එම ආයතනයේ නිලධාරින්ට එරෙහිව හැටන් මහෙස්ත්‍රාත් අධිකරණය හමුවේ නෛතික පියවර ගන්නා බව නුවරඑලිය දිස්ත්‍රික් පාරිභෝගික සේවා අධිකාරියේ ස්ථානාධිපති රංග කරුණාරත්න මහතා කියා සිටි.