රුපියල් එක් ලක්ෂ පනස් දහසක අල්ලසක් ලබාගත් මහනුවර මහ නගර සභාවේ නාගරික මන්ත්‍රීවරුන් දෙදෙනෙකු අත් අඩංගුවට ගෙන තිබේ.
ඒ අල්ලස් හෝ දූෂණ චෝදනා විමර්ශන කොමිෂන් සභාවේ නිලරීන් අද(5) පස්වරුවේ කළ වැටලීමකදීයි.
මහනුවර කටුගස්තොට පාලම අසල ඩිජිටල් පුවරුවක් සවිකිරීම සඳහා මහනුවර මහ නගර සභාව මූලික අනුමැතියක් ලබාදී තිබේ.
එම කටයුතු කඩිනම් කිරීම සඳහා මෙම මන්ත්‍රීවරුන් පැමිණීලිකරුගෙන් මෙලෙස අල්ලසක් ඉල්ලා ඇතැයි, අල්ලස් හෝ දූෂණ චෝදනා කොමිසමේ විමර්ශන අධ්‍යක්ෂ, ජ්‍යෙෂ්ඨ පොලිස් අධිකාරි පද්මිණී වීරසූරිය මහත්මිය සඳහන් කළා ය.
සැකකරුවන් දෙදෙනා අත්අඩංගුවට ගෙන ඇත්තේ, මහනුවර ප්‍රදේශයේ පෞද්ගලික රෝහලක රථ ගාලකදීයි.
අත්අඩංගුවට ගත් නාගරික මන්ත්‍රීවරුන් දෙදෙනා අධිකරණයට ඉදිරිපත් කිරීමට නියමිතයි.