විශ්වාසභංග යෝජනාවෙන් පසු ආණ්ඩුවේ ඉදිරි කටයුතු පිලිබද සාකච්ඡා කිරීම සදහා අගමැති රනිල් වික්‍රමසිංහ මහතා හා ජනාධිපති මෛත්‍රීපාල සිරිසේන මහතා අතර හමුවක් ඊයේ 05 රාත්‍රියේ පැවැත්වී තිබෙනවා.
එජාපයේ ජ්‍යෙෂ්ඨ අමාත්‍යවරුන් පිරිසක්ද මෙය සහභාගී වී තිබෙන අතර විශ්වාසභංග යෝජනාවට පක්ෂව ඡන්දය භාවිතා කළ ශ්‍රීලනිප ඇමතිවරුන් ආණ්ඩුවෙන් ඉවත් විය යුතු බවට අග්‍රාමාත්‍යවරයා අදහස් දක්වා තිබෙන බව පැවසෙනවා.
එහෙත් ජනාධිපතිවරයාගෙන් ඊට යහපත් ප්‍රතිචාරයක් ලැබී නැති බවයි පැවසෙන්නේ.
විශ්වාසභංග යෝජනාවට සහය පළ කළ ශ්‍රී ලංකා නිදහස් පක්ෂයේ අමාත්‍යවරුන් පිරිස අනිවාර්යයෙන් ආණ්ඩුවෙන් ඉවත් කිරීමට කටයුතු කරන බව අමාත්‍ය රාජිත සේනාරත්න ‘බීබීසි සිංහල සේවය’ට අදහස් දක්වමින් ප්‍රකාශ කර ඇති අතර, ආණ්ඩුව තුළ අනිවාර්යයෙන් රැඳී සිටිමින් කටයුතු කරන ලෙස ජනාධිපති මෛත්‍රීපාල සිරිසේන තම කණ්ඩායමෙන් ඉල්ලීමක් කළ බවත්, ජනාධිපතිතුමාගේ කැමැත්ත අනුව ඇමති පදවිවල දිගටම රැඳී සිටින බවත් ශ්‍රී ලංකා නිදහස් පක්ෂයේ ජ්‍යෙෂ්ඨ උප සභාපති කම්කරු ඇමති ඩබ්ලිව්.ඩී.ජේ.සෙනෙවිරත්න ප්‍රකාශ කර තිබිණි.
ශ්‍රීලනිප ඇමතිවරුන් වහාම ආණ්ඩුවෙන් ඉවත් කරන ලෙස ඉල්ලමින් එජාප මන්ත්‍රීවරුන් තින් තුන් දෙනෙකුගේ අත්සනින් යුතු ලිපියක් අගමැතිවරයාට යොමුකර තිබුණි.
කෙසේ වෙතත් අගමැතිවරයාට එරෙහිව ඡන්දය භාවිතා කළ ශ්‍රීලනිප ඇමතිවරුන් පවසන්නේ, අගමැතිවරයා පිළිබද අවිශ්වාසයක් තිබුණද කැබින්ට් මණ්ඩලය තුල රැදී සිටීමේ හැකියාවක් ඇති බවයි. ආණ්ඩුවෙන් සහ ඇමති තනතුරුවලින් ඉවත් වන්නේ ජනාධිපති මෛත්‍රීපාල සිරිසේනගේ නියෝග අනුව පමණක් බවද ඔවුන් කියා සිටිති.