ජනාධිපති මෛත්‍රිපාල සිරිසේන මහතා සහ අග්‍රාමාත්‍ය රනිල් වික්‍රමසිංහ මහතා අතර විශේෂ සාකච්ඡාවක් සඳුදා හෝ අඟහරුවාදා පැවැත්වීමට නියමිත බව වාර්තා වේ.
ඒකාබද්ධ විපක්ෂයේ පාර්ලිමේන්තු මන්ත්‍රිවරුන්ට පාර්ලිමේන්තුවේ ස්වාධීන වෙනම කණ්ඩායමක් ලෙස ක්‍රියා කිරීමට තිබෙන හැකියාව ඇතුළු තවත් විශේෂ දේශපාලන කරුණු රැසක් මෙහිදී සාකච්ඡා කිරීමට නියමිත බව දැනගන්නට ඇත.
පාර්ලිමේන්තුවේ ස්වාධීනව වෙනම කණ්ඩායමක් ලෙස කටයුතු කළ යුතු බව පවසමින් ඒකාබද්ධ විපක්ෂය පසුගිය පාර්ලිමේන්තු සතියේදී සිදුකිරීමට සැලැසුම් කරන ලද අඛණ්ඩ විරෝධතාව තාවකාලිකව නතර කළේ මෙම ගැටලුව සාකච්ඡා කර විසඳුමක් ලබාදෙන බවට අග්‍රාමාත්‍ය රනිල් වික්‍රමසිංහ මහතා එම පාර්ලිමේන්තු මන්ත්‍රිවරුන්ට පොරොන්දු වුණු නිසාය. ජනාධිපති සමඟ සාකච්ඡා කර මීළඟ පාර්ලිමේන්තු සතියේදී එය දැනුම් දෙන බවද අග්‍රාමාත්‍යවරයා ප්‍රකාශ කළේය. පාර්ලිමේන්තුව ලබන 23 වැනිදා රැස්වීමට නියමිතය.