LTTE යැයි සැකපිට අත්අඩංගුවේ සිටින පුද්ගලයින් නිදහස් කළ යුතු බවත් ඒ පිළිබඳව ජනාධිපතිවරයාගේ අවධානය යොමු කළ අවස්ථාවේදී “එය කලයුත්තක්” බව ජනාධිපතිවරයා පැවසූ බවත් එක රටක් එක නීතියක් සඳහා වූ ජනාධිපති කාර්ය සාධක බලකායේ සභාපති, බොදු බල සේනා නායක, රාජකීය පණ්ඩිත ගලගොඩඅත්තේ ඥානසාර හිමියෝ මාධ්‍යවේදියෙකු නැගූ ප්‍රශ්නයකට පිළිතුරු ලබා දෙමිනි ඊයේ (2)දින කොලොන්නාවේදී පැවසූහ.
තමන් වහන්සේව සිරගත කල අවස්ථාවේදී, LTTE යැයි සැකපිට අත්අඩංගුවට ගෙන වැලිකඩ බන්ධනාගාරයේ රඳවා සිටි බොහෝ දෙනෙක් තමන් වහන්සේ සමීපයට පැමිණ ඔවුන්ගේ ජීවිත කතාව පැවසූ බවත් ඥානසාර හිමියෝ පැවසූහ.
මේ වනවිට යුද්ධය අවසන් බැවින්, තවදුරටත් මේ තුවාලය පාරමින් සිටීමේ අවශ්‍යතාවයක් නොමැති බවත් LTTE සිරකරුවන්ට නිදහස ලබා දීම වැදගත් බව පෙන්වා දෙමින් අවස්ථා කිහිපයකදී ඔවුන්ට නිදහස ලබා දෙන ලෙස වර්තමාන ජනාධිපතිවරයාගෙන් තමන්වහන්සේ ඉල්ලීම් කළ බවත් උන්වහන්සේ සඳහන් කරන ලදි.
“බටහිරත් යුරෝපයේත් ද්‍රවිඩ බෙදුම්වාදී බලවේග මේකත් එක හේතුවක් කරගෙන රටට එරෙහිව බලමුළු ගොඩ නැගීමට කටයුතු කරමින් සිටින බව පෙන්වා දුන් ඥානසාර හිමියෝ එක රටක් එක නීතියක් ජනාධිපති කාර්ය සාධක බලකාය විසින් උතුරු නැගෙනහිර පළාත්වල සිදුකල සංචාරයන් අතරතුරදී කිලිනොච්චිය, මුලතිව්, යාපනය යන ප්‍රදේශවලදී සිරගතව සිටින පුද්ගලයන්ගේ දෙමව්පියන් පැමිණ තම දරුවන් නිදහස් කරන ලෙස ඉල්ලීම් කළ බවත් පැවසූහ.
පසුගිය ජනවාරි 20 වැනිදා පැවති රැස්වීමක් අතරතුරදී ද මේ සිරකරුවන්ට නිදහස ලබා දීම වැදගත් බව ජනාධිපතිවරයාට තමන් වහන්සේ මතක් කළ බවත් “එය කලයුත්තක්..” බවත් “එය කලයුතුයි…” යන්න එතුමාගේ සිතේ තිබුණු බවත් උන්වහන්සේ සඳහන් කර සිටියෝය.
LTTE සැකකරුවන් නිදහස් කළහොත්, බෙදුම්වාදී අඳුරු සේවනැලිවලට ගොඩ නගින්න තිබෙන අවස්ථාව නැතිවෙන බවත් පෙබරවාරී 4 නිදහස් දිනයේදී කිහිපදෙනෙකුට හෝ නිදහස ලැබෙනු ඇතැයි තමන්වහන්සේ විශ්වාස කරන බවත් ඥානසාර හිමියෝ පැවසූහ.