ශ්‍රී ලංකා මහ බැංකුවේ බැදුම්කර නිකුතුවේදී සිදුවූ බව කියන මහා පරිමාණ වංචාව පිළිබදව විමර්ශනය කිරීම සදහා පත්කල විශේෂ ජනාධිපති කොමිසමේ අවසන් වාර්තාව සතියක කාලයක් ඇතුළත පාර්ලිමේන්තුවට ඉදිරිපත් කරන බව ජනාධිපතිවරයා විසින් ඊයේ කතානායකවරයාට දන්වා තිබිණි.
බැදුම්කර කොමිසමේ වාර්තාව පාර්ලිමේන්තුවට ඉදිරිපත් කිරිමට කල් ගන්නා අතරතුර එහි අන්තර්ගත කරුණු කිහිපයක් සංශෝධනය කිරීමට ජනාධීපතිවරයා සමීපයේ සිටින කිහිප දෙනෙකු කරුණු සොයමින් සිටින බවට ඉතා විශ්වාස කටයුතු ආරංචි මාර්ගවලින් අනාවරණය වේ.
මීට හේතුවී තිබෙන්නේ බැදුම්කර වාර්තාව සම්බන්ධයෙන් ජනාධිපතිවරයා විසින් කරනු ලැබූ විශේෂ ප්‍රකාශයේ ඇතුළත් වූ කරුණු කිහිපයක් බැදුම්කර විමර්ශන වාර්තාවේ සදහන් නොවී තිබීම යැයිද එම ආරංචි මාර්ග කියා සිටී.
පිටු එක්දහස් දෙසිය ගණනක් වූ බැදුම්කර කොමිෂන් වාර්තාව ජනාධිපතිවරයාගේ විශේෂ ප්‍රකාශයට පිටු තුනකට සංක්ෂිප්ත කළේ කෙසේදැයි පසුගිය දින කිහිපය පුරා දේශපාලන ක්ෂේත්‍රයේ කතා බහට ලක්විණි. බැඳුම්කර වාර්තාව සහ ජනාධිපතිවරයාගේ ප්‍රකාශය අතර දැඩි පරස්පරතාවයක් ඇති බවටද සැක පළකෙරුණු අතර, ජනාධිපතිවරයා විසින් කියවූයේ එක්තරා ප්‍රබල ලේකම්වරයෙකු විසින් අගමුල පටලවා ලියාදුන් ලියවිල්ලක් යැයිද කියවිණි.