විශ්වවිද්‍යාල නැවත ආරම්භ කිරීමට අවශ්‍ය සෞඛ්‍ය මාර්ගෝපදේශ මාලාවක් සකස් කිරීම සඳහා කමිටුවක් පත් කර තිබේ.
විශ්වවිද්‍යාල ප්‍රතිපාදන කොමිෂන් සභාවේ සභාපති මහාචාර්ය සම්පත් අමරතුංග මහතා සඳහන් කළේ, එම කමිටුව සඳහා සෑම විශ්වවිද්‍යාලයකින්ම නියෝජිතයෙකු පත් කර ඇති බවය.
කොවිඩ් රෝග පාලන රාජ්‍ය අමාත්‍ය විශේෂඥ වෛද්‍ය සුදර්ශනි ප්‍රනාන්දුපුල්ලේ මහත්මිය ද ඇතුළත්ව එම කමිටුව සඳහා නම් කර ඇති නියෝජිතයින් සංඛ්‍යාව 16 කි.
කමිටු සාමාජිකයින් මේ වනවිට විශ්වවිද්‍යාල නැවත ආරම්භ කිරීම සඳහා සෞඛ්‍ය මාර්ගෝපදේශන මාලාවක් සකස් කිරීමෙහි නිරතව සිටී.
විශ්වවිද්‍යාල පසුගිය 28 වැනි දා නැවත ආරම්භ කිරීමට නියමිතව තිබුණ ද එය සති දෙකකින් කල් දැමීමට අධ්‍යාපන අමාත්‍යාංශය තීරණය කළේ, කොරෝනා ව්‍යාප්තිය උත්සන්න වීම හේතුවෙනි.