වියළි මිදි ඇසුරුම් අතර සඟවා මෙරටට ආනයනය කරන ලද රුපියල් එක්කෝටි හැත්තෑ හතර ලක්ෂයකට අධික වටිනාකමකින් යුතු වියළි කහ තොගයක් සිය භාරයට ගත් බව රේගු මාධ්‍ය ප්‍රකාශක, නියෝජ්‍ය රේගු අධ්‍යක්ෂ (නීති කටයුතු) සුදත්ත සිල්වා කීවේය.
මෙම වියළි කහ ප්‍රමාණය කිලෝග්‍රෑම් විසි හත්දහස් නමසිය හතළිස් පහකි. (27,945).
වියළි මිදි බවට රේගුවට ලේඛන ඉදිරිපත් කර ඉන්දියාවේ සිට මෙරටට බහාලුම් හතරක් ආනයනය කර තිබූ අතර, එම බහාලුම් ඔරුගොඩවත්ත ආර්.සී.ටී. රේගු අංගණයේදී ඉකුත් 21 වැනිදා සිට පරීක්ෂාවට ලක් කෙරිණි.
කොළඹ 12, පරණ යොන් වීදියේ පෞද්ගලික ආයතනයක් විසින් මෙම වියළි මිදි බහලුම් මෙරටට ආනයනයකර තිබුණි.
මෙම වියළි කහ තොගය වියළි මිදි හිස් ඇසුරුම් තුළ බහා මෙරටට ආනයනය කර තිබූ බව රේගු මාධ්‍ය ප්‍රකාශකවරයා කීවේය.
අදාළ සමාගම විසින් රේගුවට ප්‍රකාශ කර ඇත්තේ බහාලුම් හතරේ වියළි මිදි කිලෝග්‍රෑම් අසු දහසක් තිබෙන බවය. නමුත් අදාළ බහලුම් තුළ තිබූ වියළි මිදි ප්‍රමාණය කිලෝග්‍රෑම් 47,300කි.