කොවිඩ් ප්‍රතිශක්තිකරණ එන්නත් මාත්‍රා තුනම ලබාගෙන ඇති පුද්ගලයකුට කොවිඩ් ආසාදනය වුවහොත් ඔහුගෙන් තවත් කෙනකුට කොවිඩ් වෛරසය සම්ප්‍රේෂණය වීම ඉතා අවම බව කොළඹ වෛද්‍ය පර්‌යේෂණ ආයතනයේ වෛරසවේදය පිළිබඳ විශේෂඥ වෛද්‍ය නදීක ජානගේ පවසයි. ඊයේ (31දා) සෞඛ්‍ය ප්‍රවර්ධන කාර්යාංශයේ පැවති මාධ්‍ය හමුවට එක්වෙමින් හෙතෙම අවධාරණය කළේය.
එසේම සම්පූර්ණ එන්නත්කරණයට ලක්වූ පුද්ගලයකුට කොවිඩ් අසාදනය වීමෙන් දින හතකට පසු නිරෝධායන කාලසීමාව අවසන් කර සිය දෛනික රාජකාරි සිදුකිරීමට අවස්ථාව සලසා දී තිබේ.
මෙලෙස පූර්ණ එන්නත්කරණයට ලක්වූ පුද්ගලයකුට කොවිඩ් අසාදිත වී දින හත ගත වූ පසු යළි සේවයට වාර්තා කිරීමේදී රැපිඩ් ඇන්ටිජන් වාර්තාවක් හෝ පී .සී. ආර් වාර්තාවක් ආයතනයට ඉදිරිපත් කිරීම අනවශ්‍ය බව සෞඛ්‍ය අංශ පවසයි. මේ වනවිට කොවිඩ් වෛරසයේ ශීඝ්‍ර ව්‍යාප්තිය සමග ආසාදිතයන් වැඩිවන බවත් සෑම තත්ත්පර දොළහකට වරක් ලෝකයේ කොවිඩ් ආසාදිතයකුගේ මරණයක් සිදුවන තත්ත්වයකට පත්ව ඇති බවත් විශේෂඥ වෛද්‍යවරයා මෙහිදී අවධාරණය කළේය.