කොළඹ ප්‍රදේශයේ මත් ද්‍රව්‍ය ජාවාරම්කරුවකු සමග එක්ව අනුරාධපුර නගරය තුළ මත් කුඩු බෙදා හැරියේ යැයි කියන අනුරාධපුර කොට්ඨාස පොලිසියේ රථවාහන අංශයේ කොස්තාපල්වරයකු ලක්ෂ හතක මත්කුඩු සමග අත්අඩංගුවට ගත් බව පොලිසිය පවසයි.
හෙරොයින් මත්කුඩු බෙදා හැරීම සඳහා පොලිස් කොස්තාපල්වරයාගේ නිවෙසේ කාමරයක මෙහෙයුම් මැදිරියක් ලෙස සකසා ඇතැයි ද අනුරාධපුර කොට්ඨාස අපරාධ විමර්ශන අංශය පවසයි.
සැකකාර රථවාහන අංශ නිලධාරියා සන්තකයේ තිබී හෙරොයින් මත්කුඩු ග්රෑම් 15යි, මිලි ග්රෑම් 200 ක් සහ කුඩු ජාවාරම්කරු සන්තකයේ තිබී, හෙරොයින් මත්කුඩු ග්රෑම් 1 ක ප්‍රමාණයක් සොයා ගත් බව පොලිසිය පවසයි.
සැකකාර පොලිස් නිලධාරියා මීට පෙර, වසර 7 ක පමණ කාලයක් බම්බලපිටිය පොලිසියේ දූෂණ මර්දන අංශයේ රාජකාරි කරමින් සිටියදී, මහා පරිමාණ මත්ද්‍රව්‍ය ජාවාරම්කරුවකු වන ‘කුඩු අනුරුද්ධ’ නැමති අය හදුනා ගෙන ඇති බවත්, එම ජාවාරම්කරු කේරළ ගංජා සහ මත් පෙති ජාවාරමක් සම්බන්ධයෙන් මීට පෙර අත්අඩංගුවට පත්ව, වසර එක හමාරක කාලයක් බන්ධනාගාරගතව සිටියදී, මෙම පොලිස් නිලධාරියා ඔහුට උදව් උපකාර කර ඇති බවද පොලීසිය සඳහන් කළේය.