සේවාවන් කිහිපයක් අත්‍යවශ්‍ය සේවාවන් බවට ප්‍රකාශයට පත්කරමින් අතිවිශේෂ ගැසට් නිවේදනයක් නිකුත් කර තිබේ.
ජනාධිපති රනිල් වික්‍රමසිංහ මහතාගේ නියමය පරිදි එම ගැසට් නිවේදනය නිකුත් කර ඇති අතර ජනාධිපති ලේකම් ඊ.එම්.එස්.බී. ඒකනායක මහතා විසිනි.
විදුලිබල සැපයීම සම්බන්ධ සියලු සේවා, ඛනිජ තෙල් නිෂ්පාදන හා ඉන්ධන සැපයීම හෝ බෙදාහැරීම, තීරුබදු ආඥා පනතේ කාර්යය සඳහා අර්ථකතනය කරනු ලැබූ පරිදි යම් වරායක් ඇතුළත වූ යාත්‍රාවලින් ආහාර හෝ පාන ද්‍රව්‍ය, තෙල් හෝ ඉන්ධන ගෙනයාම, ගොඩබෑම, ගබඩා කිරීම, භාරදීම හා ඉවත් කිරීම සම්බන්ධ සේවා ගැසට් නිවේදනය මගින් අත්‍යවශ්‍ය සේවාවන් ලෙස ප්‍රකාශයට පත්කර තිබේ.
ඊට අමතරව ගුවන්තොටුපොළ, වරාය ඇතුළුව ගුවන් මගීන් ගමනාගමන සේවා සඳහා පහසුකම් සැලසීම හා පවත්වාගෙන යාම සම්බන්ධ සේවා ද අත්‍යවශ්‍ය සේවාවන් ලෙස අදාළ ගැසට් නිවේදනය මගින් ප්‍රකාශයට පත්කර ඇත.