වැලිගම සිදු වූ වෙඩි තැබීමෙන් මියගිය පොලිස් සැරයන්වරයා උපපොලිස් පරීක්ෂක ධූරයට උසස් කර තිබේ.
මියගියේ 46 හැවිරිදි ගලේවෙල ප්‍රදේශයේ පදිංචි පොලිස් සැරයන්වරයෙකි.
මියගිය පොලිස් සැරයන්වරයාගේ දේහය ගලේවෙල ආදාගල ප්‍රදේශයේ පිහිටි ඔහුගේ නිවසට ඊයේ (01) පස්වරුවේ රැගෙන ගියේය.
කොළඹ අපරාධ කොට්ඨාසයට අනුයුක්තව සේවය කළ අදාළ සැරයන්වරයා මියගියේ, පෙරේදා අලුයම පැලෑන ප්‍රදේශයේ හෝටලයක් ආසන්නයේ වැටලීමකට ගිය අවස්ථාවේදීයි.
ලද තොරතුරකට අනුව හරක් කටා නැමැති අපරාධකරුවාට සම්බන්ධ කණ්ඩායමක් වැටලීමට ගිය අවස්ථාවේ ඒ ආසන්නයේ රැඳී සිටි පිරිසක් අපරාධ කොට්ඨාස නිලධාරීන් දෙසට වෙඩි තබා තිබේ.
දෙපිරිස අතර වෙඩිතැබීම සිදුවන අවස්ථාවේ වැලිගම පොලීසියේ ජංගම රථය ද අදාළ ස්ථානයට පැමිණ ඇති අතර එහි පැමිණි පිරිස කොළඹ අපරාධ කොට්ඨාසයේ නිලධාරීන් පැමිණ වෑන් රථය දෙසට වෙඩි තබා ඇත.
එම වෙඩි තැබීමේදී අදාළ සැරයන්වරයා ජීවිතක්ෂයට පත් වූ අතර තවත් පොලිස් නිලධාරියෙකු තුවාල ලබා කරාපිටිය ශික්ෂණ රෝහලට ඇතුළත් කෙරුණි.
සිද්ධිය සම්බන්ධයෙන් දකුණු පළාත භාර ජ්‍යෙෂ්ඨ නියෝජ්‍ය පොලිස්පතිවරයාගේ උපදෙස් මත විශේෂ විමර්ශනයක් ක්‍රියාත්මකයි.