ශ්‍රී ලංකාවේ වරායන් සංවර්ධනය කිරීමට අවශ්‍ය යුරෝපීය නවීන තාක්ෂණය ලබාදීමට බෙල්ජියම් තානාපතිවරයා එකඟතාවය පළ කර තිබේ.
අමාත්‍ය නිමල් සිරිපාල ද සිල්වා මහතා කළ ඉල්ලීමක් අනුව එම එකඟතාවය පළ කළ ඇති බව වරාය, නාවික හා ගුවන් සේවා අමාත්‍යාංශය පවසයි.
ත්‍රිකුණාමලය සහ ගාල්ල වරායන් සංවර්ධනය කිරීමට අවශ්‍ය සහය ලබා දෙන ලෙස සහ එම සංවර්ධන කටයුතු සඳහා බෙල්ජියානු ආයෝජකයින් හට ශ්‍රී ලංකාවේ අවස්ථා ලබාදීමට හැකි බව අමාත්‍යවරයා එහිදී පවසා ඇත.
ඒ අනුව මෙහෙයුම් කටයුතු සඳහා යුරෝපීය නව තාක්ෂණය උපයෝගී කර ගන්නා බවත්, එම තාක්ෂණය කොළඹ වරායේ මෙහෙයුම් කටයුතු සඳහා යොදාගැනීමට අවශ්‍ය සහය ලබා දීමටත් තානාපතිවරයා සිය කැමැත්ත පළ කර තිබේ.
බෙල්ජියම් ආයෝජකයින් විසින් දකුණු පළාතේ පවත්වාගෙන යනු ලබන යොට් යාත්‍රා අංගනයේ රැකියා අවස්ථාවන් සඳහා ශ්‍රී ලාංකික තරුණයින් හට පුහුණුවක් ලබා දීමට ඇති හැකියාව පිළිබඳව ද මෙහිදී දෙපාර්ශ්වය සාකච්ඡා කර ඇති බව සඳහන් වෙයි.