චීන රජය විසින් මෙරට පාසල් දරුවන්ට නොමිලේ ලබා දුන් නිල ඇඳුම් පරිත්‍යාගය වෙනුවෙන් පැවැති උත්සව දිනයේ දී සිදුවූ යම් කාරණාවක් චීන රජයටත් වඩා මෙරට මාධ්‍ය කිහිපයකට ගැටළුවක් වී තිබූ බව අගමැතිනි හරිනි අමරසූරිය මහත්මිය සඳහන් කරයි.
විපක්ෂයේ දේශපාලඥයන්ගේ උවමනාව මත ක්‍රියා කරන මාධ්‍ය කිහිපයක් විසින් එය විශාල ගැටළුවක් කර ඇති බවත් රටවල් දෙකක් අතර ගැටුම්කාරී තත්ත්වයක් වර්ධනය වන ආකාරයට අදාළ සිදුවීම වාර්තා කර තිබූ බවද ඇය කියා සිටියාය.
නමුත් චීන තානාපතිවරයා එම තත්වය වඩා හොඳින් වටහාගෙන යුතු කරන තත්ත්වයක් තුල විපක්ෂය උත්සාහ කරන්නේත් ආණ්ඩුවට රාජතාන්ත්‍රික සබඳතා කළමනාකරණය කිරීමට බැරි බව පෙන්වීමට බවත් පැවසුවාය.
ජනාධිපතිවරයාගේ ඉන්දීය සංචාරයෙන් තම රාජතාන්ත්‍රික කළමනාකරණය මැනවින් ඔප්පුවෙමින් ඇතැයිද කියා තව දුරටත් කියා සිටියාය.
පාර්ලිමේන්තුව අමතමින් ඇය මෙම අදහස් පල කරන ලදී.
අදාල උත්සවයේදී චීන රජය විසින් ලබා දුන් පරිත්‍යාගය පිළිගනිමින් ඇය චීනයේ ප‍්‍රධාන සතුරෙකු සේ සලකන චීන ජනරජය (තායිවානය)ට ස්තුති කළේ යැයි මෙරට මාධ්‍ය කිහිපයක් ම වාර්තා කර තිබිණි.
චීනයට ‘මහජන චීන සමූහාණ්ඩුව‘ (People’s Republic of China (PRC) ලෙස පවසන අතර ‘චීන ජනරජය’ (Republic of China’ ROC) යයි පවසන්නේ තායිවානයටයි.