දකුණු සහ මධ්‍යම ආසියානු කටයුතු භාර අමෙරිකානු සහකාර රාජ්‍ය ලේකම් නීෂා බිස්වාල් මහත්මිය මේ සතියේ ශ්‍රී ලංකාවේ සංචාරයක නිරත වන බව ඇමෙරිකානු තානාපති කාර්යාලය පවසයි.
ඇය සමග දකුණු ආසියාව භාර නියෝජ්‍ය සහකාර ලේකම් මන්ප්‍රීත් සිං මහතාද දිවයිනට පැමිණීමට නියමිත බවද කියයි.
ශ්‍රී ලංකාවේ සංචාරය කිරීමට පෙර බංග්ලාදේශයේ සංචාරයක නිරත වන ඇය, ත්‍රස්තවාදය හා අන්තවාදී ක්‍රියා පිටුදැකීම වෙනුවෙන් එරට රජය ක්‍රියාත්මක කරන වැඩසටහන් සඳහා ඇමෙරිකානු සහයෝගය එරට රජය සමග සාකච්ඡා කිරීමට නියමිතය.
අමෙරිකානු සහකාර ලේකම්වරිය ඇතුළු පිරිස මෙරට සංචාරය තුළදී රජයේ නියෝජිතයින් දේශපාලන නායකයින් සහ සිවිල් සංවිධාන නියෝජිතයින් සමග සාකච්ඡා පැවැත්වීමට නියමිතය.
එමෙන්ම දෙරට අතර ආර්ථික සහයෝගිතාව ප්‍රජාතන්තවාදී පාලනය සහ ප්‍රතිසන්ධානය සම්බන්ධයෙන්ද කරුණු සාකච්ඡා කිරීමට අපේක්ෂා කරන බව අමෙරිකානු රාජ්‍ය දෙපාර්තමේන්තුව නිවේදනය කර ඇති බව තානාපති කාර්යාලය පවසයි.