ආණ්ඩුව ප්‍රජාතන්ත්‍රවාදී වටපිටාවක් ඇති කරන බව පොරොන්දු දී ඊට සීමා පනවන බව ලංකා ගුරු සංගමය පවසයි.
විශ්ව විද්‍යාල ශිෂ්‍යයන් නිදහස් අධ්‍යාපනය රැකගැනීමට කලක පටන් අරගල කරන බවත්, ප්‍රජාතන්තවාදී වටපිටාවක නිදහසේ අදහස් ප්‍රකාශ කිරීමට හා විරෝධතා පැවැත්වීමට ඇති අයිතිය හකුළවමින් ආණ්ඩුව පොලීසිය හරහා අධිකරණ නියෝග ගනිමින් උද්ඝෝෂණ නැවැත්වීමට නීතිමය රාමුවක් හදාගෙන ඇති බවත් එහි ලේකම් ජෝශප් ස්ටාලින් පවසයි.
ඔහු මේ බව පැවසුවේ අන්තර් විශ්ව විද්‍යාල ශිෂ්‍ය බලමන්ඩලයේ කැදවුම්කරු ලහිරු වීරසේකර අත්අඩංගුවට ගැනීම සම්බන්ධයෙන් කොළඹදී පැවති මාධ්‍ය හමුවක් අමතමිනි.
එම මාධ්‍ය හමුවේදී ශ්‍රී ලංකා තරුණ ජනමාධ්‍යවේදීන්ගේ සංගමය වෙනුවෙන් අදහස් දැක්වූ එහි සාමාජික කෞෂල්‍ය සමින්ද බණ්ඩාර කීවේ පසුගිය රජය උද්ඝෝෂණ මර්දනය කරද්දී ඊට එරෙහිව කතා කළ එජාපය දැන් ආණ්ඩු බලයේ සිටිමින් කලින් ආණ්ඩු කළ දේම කිරීමට උත්සාහ දරන බවයි.