කොස්ගම අවි ගබඩාව පිපිරීම සම්බන්ධව යුද අධිකරණයක්‌ පිහිටුවා වරදකරුවන් වන හමුදා නිලධාරීන්ට එරෙහිව නීතිමය පියවර ගන්නා බව ආරක්ෂක ලේකම් කරුණාසේන හෙට්‌ටිආරච්චි මහතා පැවැසීය.
ඔහු මේබව පැවසූයේ ඊයේ 7 ආරක්ෂක අමාත්‍යාංශයේදී පැවති මාධ්‍ය හමුවකදීය. සාමාන්‍ය ජනතාවටත්, රණවිරුවන්ටත් රටේ නීතිය එක හා සමාන බවත් එහිදී රණවිරුවන් කියා විශේෂයක්‌ නැති බවත් හෙතෙම පැවැසීය.
කොස්ගම සිද්ධිය පිළිබඳව විධිමත් පරීක්‍ෂණයක්‌ පැවැත්වීම සඳහා ත්‍රිවිධ හමුදා මූලික පරීක්‍ෂණ මණ්‌ඩලයක්‌ පත් කළ බවත් එහි නිර්දේශ මත ඉදිරියේදී යුද අධිකරණයක්‌ පිහිටුවා ඉදිරි කටයුතු සිදු කරන බවත් ඔහු පැවැසීය. සිද්ධිය පිළිබඳව අපරාධ පරීක්‍ෂණ දෙපාර්තමේන්තුව හා රස පරීක්‍ෂණ දෙපාර්තමේන්තුව පුළුල් පරීක්‍ෂණ කරගෙන යන අතර, එහිදී සොයා ගන්නා තොරතුරුවලට අනුව පිපිරුමට හේතුව අනාවරණය කරගත් පසු එය රටට හෙළිදරව් කරන බවද ආරක්ෂක ලේකම්වරයා වැඩිදුරටත් පැවැසීය.
මේ අතර ඒකාබද්ධ විපක්ෂය මාධ්‍ය හමුවක් කැදවමින් ප්‍රකාශ කර සිටියේ රජය විසින් රජයේ ක්‍රියාකලාපය හේතුවෙන් ආරක්ෂ අංශ දැඩි ආතතියකින් පසුවන බවත්, හමුදාවේ චිත්ත ධෛර්යය හා ජීවගුණය පහළට ඇද දමා ඇති පසුබිමක, නොසැලකිල්ල යන පදනම යටතේ හමුදා නිලධාරීන්ට දඩුවම් කිරීමට තමන් ඉඩ නොදෙන බවයි.