එක්සත් ජාතික පෙරමුණ ඇතුළු හවුල් ආණ්ඩුවේ වැඩපිළිවෙලට සහය දක්වමින් සහ විපක්ෂ බලවේගවලට විරෝධය දක්වමින් විරෝධතා රැළියක් මාර්තු 15වනදා කොළඹදී පැවැත්වීමට සූදානම් වනවා.
කොළම හයිඩ් පිටියේ පැවැත්වෙන මෙම විරෝධතා රැළිය “අළුත් ලංකාවට ඉඩ දෙන්න” තේමාවෙන් පැවැත්වෙන අතර රැකියා දසලක්ෂයක් බිහි කිරීමේ වැඩපිළිවෙල කඩාකප්පල් කරමින් ආණ්ඩුවේ සංවර්ධන ක්‍රියාදාමයට එරෙහිව විපක්ෂ බලවේග විසින් ගෙනයන සාවද්‍ය ප්‍රචාරවලට එරෙහිව මෙම රැළිය සංවිධානය කරන බවයි එජාපය පවසන්නේ.
ඉන්දු ලංකා වෙළද හා සේවා ගිවිසුම සම්බන්ධයෙන් වෘත්තීයවේදීන් කොළඹදී පැවැත්වූ විරෝධය පිළිබදව අදහස් දක්වමින් අග්‍රාමාත්‍ය රනිල් වික්‍රමසිංහ මහතා ඉකුත්දා පවසා සිටියේ එම විරෝධය දක්වන පිරිස මුදල් ලබාදී ගෙන්වූ පිරිසක් බවයි. එලෙස ගෙනයන කඩාකප්පල්කාරී ක්‍රියාවලට විරෝධය පලකරමින්, රැකියා දස ලක්ෂයක් බිහි කිරීමේ තම රජයේ වැඩපිළිවෙලට සහය දැක්වීම සදහා වෘත්තීයවේදීන් මාර්තු 15දා කොළඹට රැස්වන බවයි අගමැතිවරයා පවසා සිටියේ.
මෙම රැළිය සදහා හැකි තරම් පිරිසක් සහභාගී කරවන ලෙස එජාප මූලස්ථානය විසින් සිය වෘතිය සමිති සහ ආසන සංවිධායකවරුන් දැනුවත් කර ඇති අතර පාක්ෂිකයන් කොඹට කැදවීම සදහා බස්රථ දහසක් පමණ සූදානම් කර ඇති බවයි වැඩිදුරටත් වාර්තා වන්නේ.