විශ්‍රාම වැටුපෙන් මුදලක් මාසිකව කපාගෙන සියලු විශ්‍රාමිකයන්ට අග්‍රහාර විශ්‍රාම ක්‍රමය හඳුනවා දීමට පියවර ගෙන තිබේ.
පසුගිය පළමුවැනිදා සිට අදාළ රක්ෂණ ක්‍රමයට විශ්‍රාම වැටුපෙන් මුදල් කපා ගැනීම ආරම්භ වී ඇත.
ඒ අනුව අවුරුදු 70ට අඩු විශ්‍රාමිකයන්ගෙන් මාසිකව රුපියල් 400ක් සහ අවුරුදු 70ට වැඩි විශ්‍රාමිකයන්ගෙන් රුපියල් 600ක මුදලක් අය කරනු ලැබේ.
මෙම රක්ෂණ ක්‍රමයට අකමැති 2016 ජනවාරි පළවෙනිදාට පෙර විශ්‍රාම ගත් අයට, ඔක්තෝබර් 29 සිට සති දෙකක් තුළ සිය අකමැත්ත විශ්‍රාම වැටුප් අධ්‍යක්ෂ වෙත ලිඛිතව දැනුම් දිය හැකි අතර සති දෙකකට පසු එවන අකමැත්ත ප්‍රකාශ කිරීමේ ලිපි වලංගු නොවනු ඇත.
මේ කාලය තුළ ප්‍රතිචාර නොදක්වන්නේ නම් කැමැත්ත පළ කළා සේ සලකා වැටුපෙන් මුදල් කපා ගැනීම සිදු කරන බව රාජ්‍ය පරිපාලන අමාත්‍යංශය නිකුත් කළ චක්‍රලේඛයේ සඳහන් වේ.