සියලු සැලසුම් සකස්‌ කර ඇතත් පාසල්වලට අධිවේගී අන්තර්ජාල පහසුකම් ලබා දීමේ වැඩ පිළිවෙළ දැඩි අවුල් සහගත තත්ත්වයකට පත්ව තිබේ.
අධ්‍යාපන අමාත්‍යාංශය සහ විදුලි සංදේශ නියාමන කොමිෂන් සභාව ඒකාබද්ධව මෙම වැඩපිළිවෙළ ක්‍රියාත්මක කිරීමට සැලසුම් කළ නමුත් එම කොමිෂන් සභාවේ ජාතික අධිවේගී අන්තර්ජාල ව්‍යාපෘතියේ ප්‍රධානී සනත් සිරිවර්ධන මහතා එම තනතුරින් ඉවත් කිරීම මෙම අවුල් සහගත තත්ත්වයට හේතු වී ඇත.
පාසල්වලට අධිවේගී අන්තර්ජාල පහසුකම් ලබාදීමේ සියලු සැලසුම් සකස්‌ කළේ සිරිවර්ධන මහතා ය. ඒ මහතාගේ සේවය අත්‍යවශ්‍ය බව අධ්‍යාපන අමාත්‍යාංශ ලේකම් ඩබ්ලිව්. එම්. බන්දුලසේන මහතා ද විදුලි සංදේශ නියාමන කොමිෂන් සභාවට ලිත දැනුම් දීමක්‌ කර තිබිණි.
දැනට පාසල් අතලොස්‌සකට පමණක්‌ ලබා දී ඇති 128 Kbps අන්තර්ජාල සේවාව වෙනුවට නවීන තාක්‍ෂණයෙන් පණ ගැන් වූ 10Mbps සිට 100Mbps දක්වා වූ වේගයෙන් යුත් අධිවේගී අන්තර්ජාල පහසුකම් ලබා දීමට සියලු සැලසුම් සකස්‌ කර තිබිණි.
පාසල්වලට අධිවේගී අන්තර්ජාල පහසුකම් ලබාදීමේ වැඩසටහන ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් පොළොන්නරුව රාජකීය විදුහලෙන් මෙම මාසයේදී ආරම්භ කිරීමට ද සැලසුම් කර තිබිණි.
– දිවයින