ශ්‍රී ලංකාව පොකුරු බෝම්බ වලට එරෙහි එක්සත් ජාතීන්ගේ ඔස්ලෝ සම්මුතියට අත්සන් තබා තිබේ.
මෙම වසරේ මාර්තු මස 01 වනදා සිට පොකුරු බෝම්බ භාවිතය, නිෂ්පාදනය, පැවරීම සහ රැස්කිරිම තහනම් කෙරෙන එක්සත් ජාතීන්ගේ නෛතික ලියවිල්ලට අත්සන් තැබූ බව විදේශ කටයුතු අමාත්‍යංශය සදහන් කළේය. ඒ අනුව පොකුරු බෝම්බ ජාත්‍යන්තර සම්මුතියට අත්සන් තැබූ 103 වන රට වන්නේ ශ්‍රී ලංකාවයි.
යුධ ගැටුම් පැවැති සමයේදී ශ්‍රී ලංකාව විසින් පොකුරු බෝම්බ භාවිත කළ බවට ඇතුම් පාර්ශව චෝදනා කළේය.
කෙසේවෙතත් ශ්‍රී ලංකා ආරක්ෂක හමුදා පොකුරු බෝම්බ භාවිත කළ බවට මේ වන තෙක් කිසිදු සාක්ෂියක් හමුවී නොමැති අතර ඉදිරියේදීත් භාවිත නොකරන බව මෙරට ප්‍රතිපත්තිය බව රජය පවසයි.
මේ අතර පසුගිය වසරේදී පුද්ගල නාශක බිම් බෝම්බ තහනම් කිරිමේ සම්මුතියට ද ශ්‍රී ලංකාව අත්සන් තබනු ලැබීය.
පසුගිය වසරේ දෙසැම්බර් 13 වන දින අදාළ සම්මුතියට ශ්‍රී ලංකාව අත්සන් තැබූ අතර මෙම සම්මුතියට අත්සන් තැබූ 163 වැනි රට ශ්‍රී ලංකාවයි.
මේ අතර පුද්ගල නාශක බිම් බෝම්බ තහනම් කිරිම පිළිබඳ සම්මුතියේ විශේෂ නියෝජිත ජෝර්දානයේ මිරෙද් අල් හුසේන් කුමරු ලබන සදුදා දිවයිනට පැමිණිමට නියමිතය.