බස්නාහිර පළාත තුළ සිදුකළ විශේෂ වැටලීමකදී හෙරොයින් ඇතුළු මත්ද්‍රව්‍ය සහ මත්පැන් ළඟ තබා ගත් පුද්ගලයින් 309 දෙනෙකු අත්අඩංගුවට ගෙන තිබේ.
ඊයේ(23)දින උදෑසන 6.00 සිට අද අලුයම 05.00 දක්වා කාලය තුළ මෙම වැටලීම් සිදුකර ඇති බව බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා ප්‍රකාශ කළේය.
එහිදි හෙරොයින් ළඟ තබාගත් පුද්ගලයින් 116 දෙනෙකු, ගංජා ළඟ තබාගත් පුද්ගලයින් 35 දෙනෙකු , නීති විරෝධී මත්පැන් ළඟ තබාගත් පුද්ගලයින් 113 දෙනෙකු අත්අඩංගුවට ගෙන තිබේ.
ගෝඩා ළඟ තබා ගත් පුද්ගලයින් 23 දෙනෙකු සහ අයිස් ඇතුළු විවිධ මත්පෙති ළඟ තබා ගත් පුද්ගලයින් 22 ක් අත්අඩංගුවට ගෙන ඇති බව වාර්තා වෙයි.
මෙම විශේෂ මෙහෙයුම දිනපතා සිදුකිරීමට නියමිත බව ද නියෝජ්‍ය පොලිස්පති දේශබන්දු තෙන්නකෝන් මහතා සඳහන් කළේය.