මඩවල කැටවල වසා දැමූ අරාබි පාසල අද 06දා යළි විවෘත කිරීමට සූදානම් වුවත් එම පාසල යළි විවෘත කිරීම තාවකාලිකව නතර කිරීමට මාතලේ ප්‍රාදේශීය සභාව ඊයේ 05දා තීරණය කළාය. සභාපති කපිල බණ්‌ඩාර හීන්දෙනිය මහතාගේ (ශ්‍රීලංපො.පෙ) ප්‍රධානත්වයෙන් ප්‍රාදේශීය සභා ශ්‍රවණාගාරයේදී ප්‍රාදේශීය සභාව රැස්‌විය. මෙම පාසලේ ඉගෙනුම ලබන ශිෂ්‍යයන් මඩකලපුව, කල්මුනේ වැනි ප්‍රදේශවල පදිංචිකරුවන් බව පැවසූ මන්ත්‍රීවරු විදුහල්පති අම්පාරේ බව පැවසූහ.
එක් දහම් පාසල් ගොඩනැගිල්ලක්‌ ඉදිකිරීමට ප්‍රාදේශීය සභාව අවසර දුන්නත් තවත් ගොඩනැඟිලි ඉදිකර ඇතැයි සභාපතිවරයා පැවසීය. මෙම අරාබි පාසල පවත්වාගෙන යැමට තමා අත යට සන්තෝෂම් අරගෙන ඇතැයි දේශපාලන විරුද්ධවාදීන් තමාට තේ කඩ ගානේ මඩ ප්‍රහාර එල්ල කරන බවද ඔහු සඳහන් කළේය.
මාතලේ ප්‍රාදේශීය ලේකම් ලංකා ප්‍රියානි මධුවන්ති මහත්මිය කොන්දේසි සහිතව පාසල යළි විවෘත කිරීමට අවසරදී ඇතත් ජනතාව බියෙන් පසුවන බව සභාපතිවරයා පැවසීය. විපක්‌ෂ නායක ගාමිණි කොස්‌තා මහතා (එජාප) අරාබි පාසල විවෘත කරන්න දේශපාලකයන් අවසරදී ඇත්තේ බල අරගලයට අවශ්‍ය ඡන්ද එකතු කරගන්න යෑයි චෝදනා කළේය